Malcom (dua kanan) enggau Melintang (tiga kanan) begambar enggau raban Exco PVTKR rambau Aum Besai Ninting Taun ti Ke-6 PVTKR di sebuah hotel ditu kena 31 Januari ti tadi.

KUCHING: Kaban Gerempung Veteran Soldadu Kor Renjer (PVTKR) dipinta terus ngembuan pengeransing, lurus ati, bekerejasama enggau bebendar ngatur pengawa mantu veteren soldadu ti udah bebendar meri jasa ngagai menua.

Presiden PVTKR Leftenan Kolonel (B) Mohd. Melintang Abdullah madahka pengawa nya dikena nyapai juluk ati PVTKR neruska legasyen Kor Rejimen Renjer DiRaja ti udah mayuh meri jasa ngelikunka menua sereta ngemansutka mayuh bujang berani.

“PVTKR udah ngembuan urung 1,000 iku kaban lalu genap minggu PVTKR bisi nerima peminta nyadi kaban baru.

“Raban vateren mayuh nyereta PVTKR tu nyengkaum raban Exco enggau raban PVTKR ti meri servis manah enggau efisyen,” ku iya.

Melintang bejaku munyi nya rambau Aum Besai Ninting Taun ti Ke-6 PVTKR di sebuah hotel ditu kena 31 Januari ti tadi.

Iya meri terima kasih ngagai semua Exco enggau raban PVTKR atas pemujur aum besai nya mega.

Pengawa nutup aum besai tu dipenyadika Menteri Muda Dagang Entarabansa enggau Pemeranak Puku ti mega Adun Lubok Antu Datuk Dr. Malcom Mussen Lamoh.

Sama bisi datai Penyanding Penemu PVTKR Lt Jen (Bersara) Datuk Stephen Mundaw enggau Direktor Opis Pekara Vateren (JHEV) Sarawak Mejer Pahot Joll.

Suara Sarawak