Kuching dipilih endur ngatur CKM laban mayuh nerima basa

KUCHING: Kuching dipilih endur ngatur Program Citrawarna Malaysia Sebilik (CKM) laban palan tu engkeman sereta nerima mayuh basa ba renggat entarabansa.

Menteri Besai Datuk Sri Ismail Sabri Yaakob madahka entara basa entarabansa ti kala diberi ngagao mengeri Kuching iya nya diaku nyadi Mengeri Kreatif Gerempung Pertubuhan Pendidikan, Saintifik dan Kebudayaan Pertubuhan Bangsa Bangsa Bersatu (Unesco) di baruh kategori gastronomi, enggau Asia Tenggara ba taun 2021 sereta Mengeri Kraf Dunya ari Kaunsil Kraf Dunya Asia Pasifik ba taun 2018.

“Penyulut nyadi Mengeri Kreatif Gastronomi ngasuh Kuching engkeman endur ngeranchakka ekonomi enggau industri dagang temuai sereta adat asal kelebih agi Sarawak.

“Program CKM ti diatur empat hari tu udah tentu ulih ngelakuka produk seni enggau pesaka asal kelebih agi Sarawak tebilang laban diuan pupu raban bansa tauka dikumbai ‘biodiversity’,” ku iya.

Ismail Sabri bejaku munyi nya rambau bejadika Program CKM 2022 di Waterfront Kuching malam ensana.

Ku iya, program besai nya udah diatur kenyau taun 1999 lalu dirintaika nyadi siti ari program besai dalam kelinda dagang temuai menua.

“Pengudah empat taun kitai enda ulih ngatur program tu, malam tu (malam ensana) kitai bisi peluang ngerami tang dalam patau Atur Pengawa Standard (SOP) ti terit awakka ulih nagang pengerekai Covid-19 sereta ngelengkaska proses jeman endemik enda lama agi.

“Seriris enggau rambai jaku CKM iya nya ‘Temasya Kepelbagaian Budaya’ sekali agi kitai ngayanka pengering enggau penyelai seni, adat asal enggau pesaka rayat Malaysia.

“Ambika chunto di Sarawak bisi 28 etnik ti mandangka penyelai adat asal ke nyadi temegah ukai semina rayat Sarawak tang serata Malaysia Sebilik.

“Ari sukut pemakai baka mee kolok, laksa Sarawak, kek lapis Sarawak, seni pemerindang ari mayuh pupu bansa nyentuk pengawa nyual asil kraf, semua nya ngembuan penyelai kediri empu,” ku iya.

Iya madahka diri enda alit ati nyema program besai nya chukup engkeman manding rambai jaku ‘Malaysia- Truly Asia’.

Sama bisi datai Tuai Pemegai Menua Tun Pehin Sri Abdul Taib Mahmud sereta bini iya Toh Puan Datuk Patinggi Ragad Kurdi Taib, Kepala Menteri Datuk Patinggi Tan Sri Abang Johari Tun Openg, Sapit Kepala Menteri Datuk Amar Awang Tengah Ali Hasan, Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah enggau ke bukai.

Suara Sarawak