Tasik Biru diatu udah berengkah ditapatka mensia mayuh. Palan tu diperambu deka digagaka palan bedaja sementara. -Gambar Ramidi Subari

KUCHING: Kaban Kunsil Nengeri (Adun) Tasik Biru Datuk Henry Harry Jinep deka nirika palan pedaja sementara ungkup pedaja ti bejual ba sitak Tasik Biru.

Ku iya, berapa hari ke udah mayuh pedaja berengkah bejual ba endur nya.

“Ba timpuh lima taun ke deka datai, penyampau tubuh pedaja di sitak Tasik Biru nambah ari 80 ngagai 200 iku,” terang iya.

Henry mansutka jaku nya di aum pemberita pengudah ngabas Sekula Primari (SK) Segong, tadi.

Ku Henry, bala pengusung ke datai kia mega udah nambah sereta palan nya udah ditapatka bala pengusung bebelika bemacham barang enggau produk.

Iya mega madahka taba ke bisi diatu enda chukup dikena nangkup penyampau pedaja ke bisi diatu lalu tebal agi bala pedaja ngena kanopi sida empu.

“Nya kebuah, kitai mesti nangkir endur sida bejual lalu mesti beperabung, disikap palan paking entukar ti chukup sereta lampu dipasang sepemanjai jalai,” terang iya.

Ku Henry, pengawa tu nunjukka penyiru enggau pemanah perintah dikena nyukung pedaja ba selampur menua ungkup pemaik ekonomi rama sida.

Berebak enggau nya ku iya, pengawa nirika taba bedaja ba endur nya ukai semina deka meri empas ekonomi rama ngagai pedaja tang mega ungkup pedaja ari sitak bukai ke datai bedaja dia.

“Taja sida pedaja ari endur bukai tang sida mega tau bedaja ba taba ke deka disediaka kami,” ku iya.

Nya alai ku Henry, iya udah berandau enggau Kaunsil Pelilih Bau ngambi nyendiaka taba sementara ungkup pedaja sereta ngasuh sida rejister ngambi kaunsil pelilih ulih ngelala penyampau tubuh pedaja.

Lebuh ditanya pasal status Pasar Serikin, Henry madahka pengawa muka pasar nya ila deka ngubah enggau ngemansangka pelilih Bau.

“Pedaja ari Pasar Serikin deka dikemendar bedaja ba endur bukai nyengkaum di Bau ngena passport ti sah ari Kompleks Imigresyen, Kastam, Kuarantin enggau Pengelikun (ICQS),” terang Henry.

Berindik ari nya ku iya, pemansang di sitak Bau mesti disungkak laban nya mengeri transit ke deka matak mayuh agi pengusung.

“Kami deka nirika mayuh agi hotel enggau nyendiaka palan pematak temuai baka Palan Budaya Bidayuh,” terang iya baru.

Sama datai Pegawai Opis Pelilih Baru Amelia Siam, pengari PPD Bau Josephine Josy, tuai komuniti enggau raban opis pelilih.

Suara Sarawak