Paul Raja

KUCHING: Dayak National Congress (DNC) udah mujur bejalaika aum besai ke tiga sekumbang udah ditumbuhka.

Pengawa bepilih komiti baru mega udah mujur dipejalaika nyerumba aum nya.

Beduduk ari nya, Paul Raja agi mengkang nyadi Chairman DNC 2022-2025 lalu komiti lama mega agi sebaka semina bisi diubah mimit enggau ngemasukka orang baru ti chakah ngereja pengawa.

Nangkanka nya, bisi mega mantaika pekara ti nanggul bansa enggau empat iti resolusyen ti udah bulih pemendar.

“Entara kebuah numbuhka DNC iya nya dikena ngangkatka bansa Dayak dalam menua Malaysia di ngembuan pupu raban bansa lalu kami ngarapka bela sama ulih idup begulai sama nadai bebagi.

“Bala dalam DNC ari pupu bansa Dayak ari Sarawak, Sabah enggau Malaysia Barat lalu ari mayuh macham pengarap (Kristian/Islam) sereta pengarap asal, nya mih kebuah kami enda nyukung sapa-sapa ti bisi ngembuan peragam ti enda menuku tauka bejai bansa,” ku Paul ba sebengkah aum pemberita ke diatur ba sebuah hotel tebilang ditu, apin lama ke udah.

“Dayak tu entara bansa ti pemadu siru enggau temuai, tang penyiru bansa Dayak suah endur orang beambi ulih ditambah agi bansa ti pengabis seranta ba Malaysia.

“Nya alai, DNC deka terus nyaga bansa Dayak ari nyadi alai orang beambi ulih lalu nyadi jematan alai mansutka penusah tauka penanggul ti nuntung ambika mudah diputarka awakka enda dichiping,” ku Paul Raja.

Empat iti resolusyen ti dibantaika lebuh TGM, keterubah iyanya menua Sarawak mesti bejalaika kuasa ba baruh Ordinan Ngerejista Pengada enggau Pemati (Cap.10(1958)

“Kami meri besai terima kasih ngagai Perintah Sarawak laban udah mujur ngambi pulai Ungkup Menua ari Perintah Pusat, lalu arinya kami ngarapka mayuh agi juluk ati kami ulih dijapai siti arinya kami deka minta perintah menua bejalaika kuasa dibaruh Ordinan Ngerejista Pnegada enggau Pemati (Cap.10(1958 Ed.)) nitihka autonomi MA63 ti dipulaika baru ngagai Sarawak nengah Pindaan Perlembagaan Persekutuan kena mulaika penuduk menua ti asal sigi nyadi kaban kunsi numbuhka Malaysia,” Ku Paul.

Resolusyen kedua iya nya Jaku Inggeris tetap nyadi jaku Rasmi Sarawak lalu jaku dikena ba sekula kelimpah ari Bahasa Melayu.

Resolusyen ketiga, ngetanka Sarawak nyadi siti ari Manua Sekular tang kemaya hari tu mayuh orang luar datai ke Sarawak ngacau lalu nabur penemu ke enda menuku ti tau ngeruga bansa.

Lalu resolusyen keempat iya nya tanah NCR patut disukat enggau diberi Hakmilik ngena Seksyen 18 kanun Tanah ukai ngena Seksyen 13.

Aum besai DNC mujur dipejalaika ba Penview Hotel, Kuching kena ari Enam tu tadi ti bisi dalam 40 iku pengari ari Sarawak, Sabah enggau Semenanjung datai ngulu aum nya.

Suara Sarawak