KENANG BEGULAI… Pengari ari ABS enggau Kolej Portman begambar ungkup kenang pengudah nyain sempekat pemereti ati.

KUCHING: Berita manah ungkup nembiak ke enda ulih nampung pelajar ngelama tu laban Gerempung Anak Borneo Semenanjung (ABS) enggau kerejasama Kolej Portman bisi nyendiaka Program Pemungkal Gawa Sambil Belajar.

Kerejasama entara Kolej Portman enggau ABS dikena nyungkak tikas pelajar enggau ekonomi rama anak Borneo ditegap lebuh kededua raban nyain Sempekat Pemereti Ati dikena nyamin pelajar tinggi enggau kereja.

Chairman enggau Presiden Portman Education Group, Ernie Chan enggau Tuai Eksekutif Kolej Portman, Pragash ngarika Kolej Portman nyain sempekat nya.

Pia mega, ABS diarika Sapit Chairperson, Ling Sanggau, Sekretari Serit Banyan enggau Tukang Wang, Clarence Juna.

Program Gawa Sambil Belajar’ kerejasama Portman, ABS enggau bala pengaji ari industri tu dikena mantu nembiak abis SPM ari Sarawak enggau Sabah ngambi nyamin pengidup ke menyana agi laban program tu bisi nyendiaka kereja enggau pelajar tinggi.

KAUL RAT… Ling ngarika ABS enggau Ernie ngarika Kolej Portman bela nyuaka tepa kelai udah nanggam kerejasama.

Raban nembiak abis SPM ke enda ulih nampung pelajar ketegal suntuk belanja deka diserap gawa dulu sebedau sida bulih Setipikit Diploma ti diaku nembiak pengawa belajar nyambil begulai enggau Kolej Portman.

Nambahka nya, program tu deka nentuka raban nembiak bulih kereja sereta bulih penatai pemisi tetap.

Program ti dipungkal Ernie tu deka nyadi pelasar ke chukup beguna mantu nembiak ke datai ari ruang bilik tusah terus maju ari sukut ekonomi rama.

Ari peneleba gawa enggau pelajar akademik, nembiak Borneo ti rejister di baruh program tu deka disikap enggau penemu, pengelandik sereta pekara profesional diguna gambit gawa ba serikat ti maju.

“Program tu mega deka ngerandang jalai ngagai nembiak ngambi enda tepejuh ngereja ulah ke enda menuku laban udah diajar enggau dilatih ngatika diri.

“Sida mega udah diajar nelebaka diri gawa sereta fokus ngemansangka diri.

“Ukai semina nya aja, bala pengaji mega deka bulih pemaik laban bulih nembiak ti bisi pelajar sereta bepenau ke alai pengawa tu deka nyaup ngerembaika agi dagang sida.

Sama datai ba pengawa ti diatur ba Kolej Portman, Mines 2, Seri Kembangan, Selangor nya pengari kededua raban sereta temuai dipebasa bukai.

Pengawa nya mega richah diatur lebuh mandangka pengawa ngajat ngelaika main asal menua Sarawak.

Lebuh ngerandau Sapit Chairman ABS, Serit Banyan, iya endang ngelaluka kerejasama nya lalu andalka program tu deka mantu mayuh agi nembiak Borneo di Semenanjung Sabah enggau Sarawak.

“Chukup gaga laban pengawa nanggam kerejasama mujur dipejalai, Puji Tuhan laban tuju kami endang deka mantu nembiak Borneo di Semenanjung Sabah enggau Sarawak lebih agi sida ke suntuk belanja ngambi terus ngubah pengidup sida.

“Peluang baka tu deka mai ubah ke diguna dikena nyungkak tikas ekonomi rama anak Borneo.

“Kerejasama tu mega nipakka juluk kami deka mantu mayuh anak Borneo bulih pengidup ke menyana.

“Pekara pelajar deka nyadi tiang ngubah pengidup bala nembiak sereta nyadi pemun dalam pemansang modal mensia, komuniti enggau menua,” ku Serit ke mega siku pengelicha.

Serit madah, penumbuh program baka tu ulih mantu sida ti kena tinggal lebuh ngembing enggau meri sukung ari sukut akademik ngambi terus nyingkang ke mua.

Iya madah baru, langgur pelajar enggau kereja ti disedia nengah program tu deka mantu nempa nembiak bulih pengidup ke menyana lebih agi anak Borneo ngambi nyadi ketuai dudi hari.

Nya alai, nembiak ke abis SPM ari Sabah enggau Sarawak ti minat masuk Program Perantisan tu tau telefon nuju pengari Kolej Portman, JL Lai ba lumur, 019-2713413 tauka Vicky ba lumur 016-6578091.

Bala nembiak mega tau betanya ngagai pengari ABS, Ling Sanggau ba lumur 010-5238895 tauka Clarence 017-6219929.

Barang sapa ke deka nemu penerang silik tauka minat masuk program tu tau rejister nengah link https://forms.gle/ygqFhSfGWVb9idEP6.

Suara Sarawak