Pemansang menua pesisir mesti dirumban

KUCHING: Perintah Sarawak keran numbuhka bemacham pemansut ekonomi.

Tu nyengkaum fokus ba pengawa betanam betupi moden, infrastruktur, nyungkak dagang temuai enggau ngerumban pemansang modal mensia baka dirintai dalam Strategi Pemansang Lepas Covid-19 (PCDS) 2030.

Kepala Menteri Datuk Patinggi Tan Sri Abang Johari Tun Openg madah, menua ulu agi tubah tinggal pemansang lalu nya kebuah pemansang menua pesisir mesti dirumban nengah pengawa nyendiaka bemacham infrastruktur.

Ku Abang Johari, infrastruktur tu baka jalai alun enggau jematan, perengkaguna nya kunchi nyungkak pemansang ekonomi enggau nangkup peminya.

“Tu ukai bejaku ngapa laban pengawa nyambung menua pesisir enggau jalai alun ke meruan sereta perengkaguna bukai dilempai ngagai Kaunsil Pemansang Koridor Wilayah (Recoda).

“Recoda tu udah bejalaika pemansang di Ejensi Pemansang Ulu Rajang (URDA), Ejensi Pemansang Tanah Tinggi (HDA) enggau Anugerah Pemansang Pengereja Pengawa (HRDA) beungkus RM4.5 bilion,” terang iya.

Abang Johari mansutka jaku nya beserimbai enggau pengawa bejadika Anugerah Penyulut Industri Kepala Menteri Sarawak (CMIEA) 2021 diatur Serakup Besai Dagang Sarawak (SBF) enggau kerejasama Kaunsil Produktiviti Malaysia (MPC) di Palan Aum Borneo Kuching (BCCK) kena 22 Febuari tu tadi.

Ku iya, Perintah Gempung Parti Sarawak (GPS) mega udah ngerembaika asil menua nengah ‘revenue re-engineering’ ngambi bisi fleksibiliti fiskal ngatur belanja sereta nusun strategi agenda pemansang.

“Tu deka nentuka Sarawak ulih bejalaika projek infrastruktur enggau perengkaguna pemun ba selampur menua enggau lengkas sereta nyendiaka rizab ti chukup napi sebarang pekara ke deka nyadi.

“Strategi tu beguna endar dikena nyapai tuju ngerumban pemansang ba menua tu nentuka pemansang sebela entara mengeri enggau menua pesisir,” terang Abang Johari.

Nambahka nya, Abang Johari madah, Sarawak deka chakah bejalaika projek besai seriris enggau agenda pemansang sereta mayuh agi sitak deka dibuka ungkup aktiviti ekonomi ti nyendiaka mayuh pengawa puang sereta dagang.

“Aku andalka semua pekara tu deka nyaga pengelantang rayat lebih agi komuniti menua pesisir,” terang iya.

Ngelansa silik, Abang Johari madahka sektor peribit mega mesti bekerejasama nyungkak pemansang ekonomi Sarawak beduduk ari menua tu udah bejalaika bemacham inisiatif ngemansangka ekonomi baru.

“Kunchi ngangkatka Sarawak ngembuan ekonomi maju manggai taun 2030 nya dagang Sarawak beranakka puku ba projek ti dipejalai ba menua tu.

“Perintah aku (GPS) deka bebendar ngelakuka pengawa dagang enggau beranakka puku entara rayat Sarawak ti minat bejalaika projek.

“Ba pekara tu, SBF beempu pangku pengawa besai nyebelaka entara komuniti dagang enggau Perintah Sarawak, kitai bekerejasama ngemujurka juluk Sarawak nyadi menua maju manggai taun 2030,” ku iya nyemetak madah.

Ba lansa bukai, iya madahka pengawa ngemansangka infrastruktur teknologi pemadah enggau komunikasyen beguna endar ngambi mai menua tu seikas enggau ekonomi maju sereta matak pengawa beranakka puku dalam bidang baru baka public computing, robotic internet enggau ke bukai.

“Taja Perintah Sarawak keran nyendiaka infrastruktur ICT tikas dunya, ekonomi digital ke benung ranchak mega mesti ngaul komuniti dagang menua ngena infrastruktur nya dikena nambahka asil dagang sida.

“Endang amat raban politik enggau perintah ulih ngaga langkar kereja ungkup ekonomi tang sektor peribit mega mesti bejalaika pengawa,” ku Abang Johari.

Suara Sarawak