KELAI BASA… Zamry enggau bini iya pengudah nerima Darjah Pangkuan Seri Melaka (D.P.S.M) ti mai gelar ‘Datuk’ taun 2021.

“UKAI senang nyadi senang, orang ti sabar selalu mujur dalam pengidup nya alai kitai idup ba dunya injau tu mesti bisi prinsip enggau lalau idup ti bebatang,” pia ku rambai jaku ke seruran nyadika tengau tauka lalau pendiau siku penanyi veteran Iban Datuk Zamry Ameera,67.

Pia ku iya mega, semua juluk ati enggau pemujur pengawa ba dunya tu enda tentu ulih diperumban kelebih agi enti utai nya bekait enggau nasit tauka jereki, enggai tauka deka kitai enda ulih enda besabar lalu nyerahka ngagai Petara kitai.

Datuk Christy Ain Manda tauka lebih agi dikelala enggau nama Zamry Amera ba dunya pemerindang endang siku penanyi lama bebansa Iban Remun ti chukup tebilang enggau lagu klasik.

PUN PENGAWA BELAGU

TERIMA KASIH…Chairman Gerempung Anak Seni Iban Malaysia (PASIMA), Isa Lee (kiba) beterima kasih ngagai Datuk Zamery Amera laban udah madahka sukung diri ngagai Pekit Bintang Klasik Iban 2022 ti deka diatur tu ila.

Sigi ngembuan pengerindu belagu lalu iya udah belagu kenyau ari umur iya manggai 17 taun.

Sebedau ngaga album Zamry kala belagu ba 4.H Club dalam taun 60an ti ngujungka iya lalu mutus ati nyadi penanyi ngerikod lagu keterubah dalam taun 1972.

Lagu ti dirikod iya keterubah iya nya Lapa Nuan Ngiga Baru lalu tiun nunda siti lagu penanyi Indonesia.

“Laban maya nya suba orang lebih rinduka tiun lagu ari menua luar, nya alai kami nengkebang leka lagu lalu ngena tiun lagu menua bukai baka lagu dibai penanyi Indonesia,” ku Zamry lebuh ngelansa kenang lagu keterubah.

Entara lagu Zamry ti chukup ngangkatka nama iya ba dunya pemerindang lalu nyentukka sehari tu iya nya Kena Jayau Tubuh Nuan, Joget Dara Bajik, ‘Bubu pisit Bubu Jarang, Joget Pansa Ngelansa, Batu Bebini enggau mayuh agi.

“Kelia ngerikod lagu kelia enda baka diatu, enda tau salah laban ungkus sua studio mar lalu chas nitih jam maya nya, lalu enda tau laun mega datai studio laban nangi ka rugi muai masa ditambahka tauke ke ngempu studio chukup terit enggau kami.

“Nyadi maya nya disiplin mesti bisi laban ukai nyamai deka ngasilka siti lagu,” ku Zamry mulai ka pengingat jeman kelia lebuh baru nyadi penanyi.

Zamry mega suah bepadu nyawa belagu begulai enggau siku penanyi indu Iban ti mega penanyi “evergreen” iya nya Lina Kidang.

NYAGA SADA NYAWA

JEMAN PIRING CHELUM…Entara gambar kenang kulit Piring Hitam lagu-lagu Datuk Zamry Amera.

Nyadi siku ari penanyi ti udah beretan lama ba dunya pemerindang, tentu ngembuan mayuh penti nyaga sada nyawa.

Zamry endang bisi chara tauka penti kediri nyaga sada nyawa.

Ku iya, tiap kali bisi dikangau orang belagu aku enggai makai kenyang, ambi ka chunto, enti belagu pukul 8 malam penudi dia iya deka makai tumu iya nya pukul 1 ngalihari.

“Dikena aku nyaga peninggi sada nyawa, aku mesti bisi mandi ba sungai lalu nyelam lama sampai aku deka luput, sampai aku mutah-mutah awak semua pansut sampai dak sekali ku buai.

“Kelimpah ari nya, pemakai mega mesti deka dijaga, anang makai utai pedas paling manah makai pemakai ti disumai rebus aja,” ku Datuk Zamry mansutka resia nyaga sada nyawa iya.

KENANG PAIT MANIS

Datuk Zamry Amera siku penanyi ti udah chukup lama ba dunya pemerindang, lalu mayuh kenang baik manis tauka pait udah diasaika iya.

“Taun 1975 aku siku ari penanyi Iban ari Sarawak dipilih RTM enggau siti raban begulai enggau pemerindang ari selampur menua Malaysia ngarika Astana Sarawak ngagai Pontianak, Indonesia enggau ngintu pengerami Merdeka menua sida ti diintu ba padang besai iya nya ba Kota Khatulistiwa, Pontianak.

“Lebuh nya aku lalu diintebiu bagi Iban ba menua Indonesia.

“Nya mih kenang ke pengabis manis ba aku lalu enda ulih dibeli ba dini-dini sepanjai aku udah ba dunya pemerindang,” ku Zamry.

Kenang pait mega bisi tang Zamry enggai ngenang agi laban nya semina tinggal kenang enggau nyadika lalau pengidup iya.

BULIH GELAR ‘DATUK’

DATUK ZAMRY AMERA.

Kena 31 Ogos 2021, dia zamry nerima siti surat madahka iya bulih Darjah Pangkuan Seri Melaka (D.P.S.M) ti mai gelar ‘Datuk’.

Tang laban kitai benung betapi enggau pengerekai igi penyakit Covid-19, nya alai pengawa nya dilanjar lalu dikemujur kena 5 Disember 2021 tu tadi ba Melaka nyerumba pengada ke-72 Tuai Pemegai Menua, (TYT) Negeri Melaka, Tun Mohd Ali Mohd Rustam.

“Aku bulih gelar DATUK tu bepun ari pemujur aku ba pengawa dagang enggau ba dunya pemerindang, lalu genap gelar nya bisi mai reti magang.

“Ukai mudah bulih gelar enti ukai ari pengawa ti udah nyulut serta mujur dipajalaika aku, laban semua nya diambi kira orang magang lalu ditapis semua,” ku Zamry.

NYULUT BEDAGANG

Zamry mega ukai semina nyulut ba dunya pemerindang, tang iya mega siku orang dagang ti tau nyadika teladan bala mayuh.

Zamry bejalaika mayuh macham pengawa dagang lalu siti ari dagang iya ti chukup maju iya nya sekula alai belajar ngambi lisin deriba.

“Mayuh macham pengawa udah diasaika aku sebedau aku berindik ba alai aku ke diatu.

“Bisi maya aku teterap labuh, angkat baru lalu belajar ari penyilap diri,” ku iya.

“Pesan aku ngagai semua orang ti deka nguji diri bedagang, mesti bisi langgur timpuh ka lama anang kurang ari lima taun lalu kitai mesti nyadi kuli ba diri empu.

“Enti kitai lalu ngemesaika diri sereta nadai ngembuan langgur ti meruan, sigi pedis deka ngemansangka pengidup tauka dagang diri empu baka bansa bukai,” ku lalau iya.

NYUKUNG PEKIT LAGU KLASIK

Ngelansa tanya sentang pekit lagu klasik Iban ti diatur sebengkah gerempung sebedau tu, Zamry madahka diri sigi nyukung amat pengawa nya dipejalaika laban nya siti ari chara ngenanka lagu asal bansa Iban.

Zamry siku ari akim tetap pekit lagu klasik Iban ti kala diatur taun 2012 suba lalu lebuh nya Esner Nala udah mujur nyadi champion ba pekit nya.

Zamry mega bisi meri agih belanja ke tanda sukung iya ngagai pengawa pekit Lagu Klasik Iban ka deka diatur taun 2022.

Lalu iya mega ngarapka bala pemesai tauka bala orang dagang bukai ulih nyaup meri agih belanja enggau bantu bukai ke tanda sukung ngagai pengawa bepekit nya.

Pekit Bintang Klasik Iban diatur Gerempung Anak Seni Iban Malaysia (PASIMA) ti betuaika pengajar Isa Lee.

LALAU NGAGAI REBAK BARU

Penanyi Iban rebak baru dikearapka terus ngembuan ati ti tegap sereta nyikap diri awakka tan betapi enggau penguji ba dunya pemerindang.

Pia mega iya arapka raban pengemeran dunya pemerindang lagu Iban seruran bebendar ngangkatka kualiti lagu diri awakka terus pegari ba mata dunya.

Suara Sarawak