MUTAR PENANGGUL…Uggah enggau Majang benung mendingka penerang ti dibantaika raban Penyangkai Kapal Samalaju.

BINTULU: Perintah nengeri nengah Opis Menteri Infrastruktur enggau Pemansang Penyangkai Kapal (MIPD) deka ngiga jalai mutarka penanggul ti ditapi penguna penyangkai kapal di menua tu.

Menteri Pemansang Infrastruktur Enggau Penyangkai Kapal Datuk Amar Douglas Uggah Embas madahka MIPD enggau Unit Perambu Nengeri (EPU), raban bekuasa penyangkai kapal enggau pengemeran deka ngatur aum di Kuching minggu tu berandauka pekara nya.

Iya madahka pekara nya lebuh ngabas Palan Penyangkai Kapal Samalaju lalu betemu pengari kanan tujuh buah serikat besai ti beroperasyen di zon industri Samalaju ti nguna palan penyangkai kapal nya nyadi pintu keluar eksport sida.

“Aku udah belajar ari ripot kita napi sekeda penanggul enggau pengirau ti ngeruga dagang enggau untung kita.

“Nengah aum ti deka datai, kami ngarapka ulih mutarka isu timpuh pandak enggau ngatur semua nya,” ku iya.

Uggah meri jamin madahka nya polisi perintah nengeri ti deka nyadi pro pemeranak puku.

“Kita semua beguna ngagai Sarawak taja pan kita nyendiaka peluang pengawa, kita mega meri bantu enggau nambahka penumbuh ekonomi kelebih agi lebuh nyendiaka Strategi Pemansang Pasca Covid-19 nuju taun 2030.

“Kami mega deka kita mantu ngelakuka Sarawak nyadi palan ti pemadu manah meranakka puku ngagai pemeranak puku bukai

“Nya alai, kami deka terus nyendiaka infrastruktur enggau ekosistem ti diguna kita,” ku iya.

Uggah madahka Kepala Menteri Datuk Patinggi Tan Sri Abang Johari Tun Openg mega udah ninga penanggul ti ditapi sida.

Nangkan nya, ba aum ti diatur ensana pengari kanan serikat nya diberi peluang mantaika penanggul enggau pengirau ati sida.

Entara pekara ti dibantaika iya nya nyumanka timpuh panjai ‘pemuatan’ ti ngujungka ungkus ti lebih tinggi.

Ku Menijar Besai Pertama Ferroalloys Yuki Nakamura, timpuh tu semina lima hari enti di menua Jipun.

“Ditu, kekadang kami nganti nyentukka 14 hari,” ku iya seraya nambah perengkaguna palan penyangkai kapal patut dikemanahka berenggat sereta betul awakka nadai ngeruga operasyen palan penyangkai kapal.

Iya mega merambu teknologi enggau perengkaguna moden patut dikena.

Menteri Muda Pemansang Infrastruktur Enggau Penyangkai Kapal tu mega Adun Samalaju Datuk Majang Renggi, Skretari Mendam MIPD Datuk Safri Zainuddin enggau Direktir EPU Datuk Dr Muhammad Abdullah Zaidel entara ti bisi datai ngulu aum nya.

Suara Sarawak