Temuai ke bisi datai ngambi awak begambar ba mua lampu ke baka bulan.

SIMANGGANG: ‘Pengerami Lampu’ ti diatur raban Gerempung Soon Heng Simanggang (SSHS) nyerumba Taun Baru China tu tadi chukup rami sereta balat narit ati bala mayuh raun ngagai palan nya ba tebing Sungai Batang Lupar (Pasar Simanggang), ditu.

Bemacham chura lampu ti bemacham chura bisi dipandangka ba pengerami tu baka ‘Eiffel Tower’, bulan kembung, dua iti pasang angsa, obor-obor, bentuk ati, bicha, patung Buddha, mayau, naga enggau jelu remaung ti nyadika lambang taun tu ba kalendar China.

Peluang ti berega tu sigi enda dilepaska peranak menua Sri Aman bebaika diri sebilik sampal ngelawa palan nya enda ngira umur nemuka nya nembiak mit, orang besai tuai enggau orang tuai.

Ngena peluang nya mega, sida beambika gambar diri empu enggau diri sebilik ba genap iti bentuk lampu enggau patung ti bisi dipandang ke dia.

Kenu ku siku temuai ti bisi ngelawa palan nya, Mariani anak Anding madahka pengerami tu siti peluang ke manah dikena ngerapatka kaul laki bini enggau diri sebilik.

Lampu bechura ati ba mua laman sebuah tepikong China.

“Kitai ukai semina ulih begambar ba mayuh bengkah bentuk lampu enggau patung dia tang mega ulih belepa enggau diri sebilik sambil ngubat runding ti tusut,” ku iya.

“Naka mih pemanah enti utai tu terus diteju ke dia aja laban ulih narit bala mayuh ngelawa palan tu genap hari datai ngelantangka ati ba palan tu, muai runding ti tusut, meri awak begulai enggau diri sebilik,” ku iya mantaika pengandal ati diri.

Penemu tu bela disukung siku peranak menua nya empu ti sempat ngelawa palan nya, Amelia Wellington madahka pengawa mensia mayuh ti enda ngetu ngelawa palan nya ulih nyungkak penatai pemisi ngagai peranak menua tu bejajaka pemakai enggau utai bukai nisi tebing sungai Batang Lupar ditu.

Nitihka penerang ari SSHS, pengerami tu dibuka ngagai bala mayuh nyerumba pengerami Taun Baru China aja berengkah ari 28 Januari 2022 tu tadi nyentuk ngagai pengerami Chap Goh Mei kena ke 15 Februari 2022 tu ila.

Lampu bechura ati ba mua laman sebuah tepikong China.

 

Siti agi lampu ke didiri ba palan nya.

 

RINDU ATI…Sekeda raban temuai begambar kenang ba mua lampu bulan nya.

Suara Sarawak