RICHAH…Letup bungai api ngenerangka kandang Waterfront Kuching kelai bejadika Program CKM 2022 di Waterfront Kuching malam, ensana. -Gambar Ghazali Bujang

KUCHING: Sarawak ngempu penyelai kediri dalam tuju ngelakuka mayuh macham daya idup sereta kaul teguh rayat pupu bansa ngagai menua luar.

Kepala Menteri Datuk Patinggi Tan Sri Abang Johari Tun Openg madahka pekara nya setipak enggau tuju ngatur Program Citrawarna Malaysia Sebilik (CKM) di Kuching, Sarawak.

“Bungkur pemesai menua Sarawak nyau deka sama enggau tanah di Semenanjung Malaysia ti ngembuan 12 bagi menua, ambika chunto menua Kapit ti nyau deka mesai nengeri Pahang.

“Bekau ari pekara tu, udah tentu Sarawak ngembuan mayuh chura laban penyelai rayat enggau rampa menua,” ku iya.

Abang Johari bejaku munyi nya rambau Program CKM 2022 di Waterfront Kuching malam, ensana.

JAKU PENGELALU…Abang Johari benung mantaika jaku pengelalu ba Program CKM 2022 di Waterfront Kuching malam, ensana.

Ku iya, dalam jaku pandak Sarawak bisi gaya kediri ti mandangka reti Citrawarna ari sukut adat asal, jaku, bansa enggau etnik, bansa pemakai, utai idup enggau utai tumbuh.

“Nya alai, kami ngelaluka temuai ari luar Sarawak datai kitu kelebih agi temuai ari Semenanjung Malaysia awakka sida ulih meda enggau ngasaika penyelai di Sarawak.

“Datai meh kitu makai mee kolok, manuk pansuh, laksa Sarawak, kek lapis enggau ke bukai laban nyangka semua utai pakai tu nadai ditemu ba palan bukai,” ku iya.

Ku Abang Johari baru, pekara nya engkeman endur Unesco ngaku Kuching nyadi Mengeri Kreatif Gastronomi laban palan tu kaya enggau mayuh bansa pemakai.

Tandu iya, Kuching mega diberi gela nyadi Mengeri Budaya lebuh Muzium Budaya Borneo iya nya muzium budaya pemadu besai di menua dibuka ngagai mensia mayuh enda lama agi.

“Di utara, mengeri Miri nyadi sebuah mengeri endur ngelantangka ati laban dampih tasik ti nyadi pintu penama ngagai kompleks gua pemadu besai di dunya iya nya Gua Niah di Mulu ke nyadi palan pesaka dunya Unesco mega.

“Gua Niah mega nyadi kompleks gua besejarah ti pemadu tuai ba rantau tu ke alai raban arkeologi udah nemu fosil tubuh mensia ti berumur lebih 60,000 taun,” ku iya.

Iya ti mega Menteri Wang Enggau Ekonomi Baru madahka Perintah Sarawak nyimpan pengarap ti tinggi ngagai kerejasama enggau Perintah Besai di baruh pegai Menteri Besai Datuk Sri Ismail Sabri Yaakob ngambika nadai wilayah di menua tu tinggal pemansang.

“Kerejasama tu mesti diteruska ditegapka ba serata menua ungkup ngemansangka menua tu nyadi menua ti maju.

“Aram kitai sama besampi ngambika semangat Malaysia Sebilik mai menua tu ba pelasar ti tegap lalu semua rayat teguh beserakup awakka kitai ulih nyapai menua ti maju,” ku iya.

Suara Sarawak