KUCHING: Parti Sarawak Bersatu (PSB) enggau Parti Warisan merambu numbuhka Perikatan Borneo (Bornean Alliance) ngambi napi Pengawa Bepilih Besai Ke-15 (PRU-15) ke deka datai.

Raban Kaunsil Presiden PSB, Baru Bian madah, pekara nya udah dikerandau iya lebuh betemu enggau Presiden Warisan Datuk Seri Shafie Apdal.

“Kami ngarap ulih numbuhka perikatan tu sekalika kita nya raban ketiga tauka dudi hari nyadi ‘kingmaker’,” terang iya, kemari.

Baru madah, pengawa numbuhka perikatan tu beguna amat ngambi rayat Sarawak enggau Sabah sama nentuka hak sida dijaga baka meri kuasa ngagai kededua nengeri.

Ku iya, dipelaba Warisan deka ngemudi perikatan nya ba Sabah enggau PSB ngemudi di Sarawak.

“Udah nya, kami deka mai parti bukai masuk dalam perikatan ngambi kitai ulih menang mayuh penuduk ba Sarawak enggau Sabah sereta mega sekeda penuduk ti diempu Warisan di Sarawak kelimpah nyadi kuasa ketiga,” terang Baru.

Ku iya, lebuh Warisan masuk Semenanjung enggau disukung Perikatan Borneo tu ulih nyadi altenatif ngagai pengundi din.

“Utai ke diperati aku diatu nya ba Semenanjung nadai gempung ke deka bulih majoriti numbuhka perintah.

“Nya kebuah, sida deka begunaka sukung ari Sarawak enggau Sabah lebuh agi pengudah beratika kitai ngembuan bemacham gempung diatu,” ku iya nerang.

Baru mega madah, ungkup PSB sida beratika tu mih maya gempung Sarawak nyadi kuasa pemadu tinggi ngambi sida ari Borneo iya nya Sabah tauka Sarawak ulih nyadi Menteri Besai.

Ditanya sekalika perikatan nya deka ngambi parti ari Semenanjung ke bisi ‘piagam’ di Sarawak enggau Sabah, Baru madahka nya bepanggai ngagai perikatan empu ngaga pemutus.

Parti nasional ke bisi ‘piagam’ di Sarawak enggau Sabah nyengkaum DAP, PKR, Amanah enggau PAS.

PERAMBU BESAI… Baru Bian (kanan) enggau Presiden Warisan Datuk Seri Shafie Apdal (kiba) berandau bemacham pekara, apin lama ke udah.

Suara Sarawak