KUCHING: Bengkel Negapka Orang Bengal 2022 ti diatur nya dikena berandauka chara pasal penanggul ditapi raban nya.

Menteri Muda Pemansang Orang Indu, Anak Mit enggau Pengintu Pengelantang Komuniti (KPWK), Pemansang Pengintu Pengelantang Komuniti Mohamad Razi Sitam madah, tu nyengkaum pekara pelajar, pengawa puang, palan rekreasyen enggau ke bukai.

Ku iya, inisiatif nya dikena meri servis pemadu manah ngagai rayat.

“Sekeda pekara ti udah dikelala deka dikemerat ngambi berundingka chara mantu orang Bengal di Sarawak bulih pengidup ke menyana agi dudi hari.

“Nengah bengkel tu mega, kitai dekaka tiap komuniti enda dikelaung ba agenda pemansang ti dipejalai Perintah Sarawak,” terang iya.

Razi mansutka jaku nya nya ba Bengkel Negapka Orang Bengal 2022 di sebuah hotel ditu, ensanus.

Nambahka nya ku iya, nya mega entara inisiatif perintah dipegai Kepala Menteri Datuk Patinggi Tan Sri Abang Johari Tun Openg nentuka pemansang terus dipejalai belama.

Nangkan nya, bengkel dipasuk 50 pengari ari lebih ari 20 serakup enggau ejensi perintah ngaul komuniti ti ulih mending enggau bengal ari dalam enggau luar Sarawak.

Bengkel tiga hari ti kena 18 ngagai 20 Februari tu tadi mujur diatur lebuh mantaika isu ari penemu orang bengal nyengkaum budaya, pengelala, audisme, bida entara Malaysia enggau komuniti bengal menua luar sereta bekunsika penemu pasal jaku isyarat.

Presiden Serakup Orang Bengal Sarawak (SSD), Albert Wong Tuong Chui madah, tuju besai bengkel tu diatur ngambi ngelala enggau berundingka chara mutarka penanggul ke suah ditapi.

“Bemacham pengawa bedua penemu dipejalai enggau tuai serakup ke bisi datai lalu ari randau nya, semua bisi tuju ke sebaka nipakka pekara diguna orang bengal.

“Semua perambu udah dibantai ngagai ejensi perintah lalu besai pengandal kami juluk nya ulih diperunding enggau dijapai ungkup pengelantang orang bengal di Sarawak,” terang iya.

Iya mega minta raban media mantu ngerembaika agi pengawa ngena ‘pekak’ lebuh nulis artikel laban hearing impaired (penanggul ninga) nya mai reti tachat.

Terang iya, pengawa ngena leka jaku ‘pekak’ mesti dikerembai ungkup penemu sereta meri penyedar ngagai mensia mayuh pasal reti linguistik minoriti.

Berebak enggau nya, bengkel ti diatur mega udah ngemataka pengawa nyain Sempekat Pemereti Ati (MoU) entara enam serakup bebida.

Tu nyengkaum Serakup Orang Bengal Sarawak (SSD), Serakup Lumba Orang Bengal Sarawak (SSDeaf) enggau Serakup Pansik Jaku enggau Orang Bengal Malaysia (MyBIM).

Pia mega, Serakup Media enggau Teknologi Orang Bengal Kuala Lumpur enggau Selangor (DeafMT), Serakup Tanda enggau Budaya Orang Bengal Sarawak (SWDAC) sereta Serakup Nembiak Orang Bengal Sarawak (SwDY).

Kelimpah ari nya, sempekat ditanggam nya dikena nempa kerejasama ke teguh agi entara serakup nya ngambi naka ulih ngemansangka orang bengal.

MOHAMAD RAZI SITAM

Suara Sarawak