Sarawak ‘Bateri Asia Tenggara’

KUCHING: Sarawak dipelaba ulih nyadi sebuah kuasa besai meri penatai kuasa ti ulih dipechaya ngagai menua Asia Tenggara tauka dikumbai ‘Bateri Asia Tenggara’.

Kepala Menteri Datuk Patinggi Tan Sri Abang Johari Tun Openg madahka nengah sektor kuasa ti ulih dikemaru tu Sarawak andal ulih nyapai penumbuh enggau penyulut nyadi kuasa besai di Asia Tenggara nyendiaka kuasa karan ngagai wilayah bukai ba rega ti patut enggau ulih dipechaya.

“Aku pechaya kitai ulih nyapai tuju nya laban menua kitai ngembuan mayuh penatai ti ulih dikemaru baka kuasa hidro enggau penatai pengeraja asal.

“Kenyau 2016, kitai udah mengeksport mayuh kuasa karan ti ulih dikemaru ngagai Kalimantan Barat lalu enda lama agi kitai deka ngepunka pengawa eksport kuasa karan ke Sabah,” ku iya.

Abang Johari bejaku munyi nya ba Pengerami Sarawak Energy Centenary Townhall di Palan Aum Borneo Kuching (BCCK) ditu, kemari.

Ku iya, pekara nya ila deka ngujungka Sarawak ulih nyapai tuju nyendiaka Grid Borneo sereta nyadi ‘bateri’ ngagai Asia Tenggara.

“Projek Kalimantan Utara nunjukka kelai maju enggau manah dalam pengawa nyendiaka pekara tu bagi nentuka pemutus pemeranak puku kepenudi.

“Nyema projek tu nyadi ila, nya deka meri empas ngagai orang pechayaka bekal kuasa ari kitai di rantau tu, numbuhka ekonomi enggau pengelantang begulai,” ku iya.

Dulu ari nya, Abang Johari madahka palan menua pesisir di Sarawak mesti disikap enggau semua perengkaguna pemun awakka mensia mayuh ulih ngambi bagi dalam aktiviti ngemansutka penatai pemisi enggau ngemanahka tikas pengidup sida.

“Nya alai, ungkup ngerapitka takah peranak mengeri enggau menua pesisir, Perintah Sarawak mesti nyingkang ngagai pemansang sosioekonomi enggau transformasyen menua pesisir awakka Sarawak ulih muka penumbuh ekonomi ti lebih tinggi lalu nyapai ekonomi ti adil.

“Enti dibanding taun 2009, palan menua pesisir nerima kuasa karan ba tikas 56 peratus tang diatu urung 97 peratus palan menua pesisir udah ngembuan akses 24 jam kuasa karan ti ulih dipechaya, ulih dikemaru enggau beresi nengah pemutar grid enggau luar grid nyengkaum kuasa solar sereta sistem mikro hidro,” ku iya.

Sama bisi datai Sapit Kepala Menteri Datuk Seri Dr. Sim Kui Hian, Menteri Utiliti Enggau Telekomunikasyen Datuk Julaihi Narawi, Menteri Betanam Betupi Moden Enggau Pemansang Kandang Menua Datuk Seri Dr. Stephen Rundi Utom, Tuai Pemesai Eksekutif Sarawak Energy Berhad Datuk Sharbini Suhaili enggau ke bukai.

Suara Sarawak