Skim ‘Vaccinated Travel Lane’ ngidupka sektor ekonomi

KUCHING: Dikena ngidupka baru sektor ekonomi nyengkaum industri dagang temuai ti sebedau tu balat tebunsa ketegal pandemik Covid-19, perintah chakah numbuhka bemacham inisiatif dikena mantu sektor ti bekaul.

Menteri Besai Datuk Sri Ismail Sabri Yaakob madahka entara pengawa ti digaga perintah nyengkaum ngemendarka pengawa neresa garis entara menua nengah skim ‘Vaccinated Travel Lane’ (VTL) langit, darat enggau tasik.

“Kelimpah Singapore enggau Indonesia, Brunei mega udah setuju enggau perambu pejalai VTL bekau randau aku enggau Sultan Brunei Sultan Hassanal Bolkiah maya nemuai ke Brunei apin lama.

“Pengawa tu ukai semina ulih nyumanka industri dagang temuai Sarawak tang ulih ngidupka baru ekonomi kelebih agi di Bagi Menua Miri, Limbang enggau Lawas ti diau ba garis entara enggau menua Brunei,” ku iya.

Ismail Sabri madah munyi nya rambau bejadika Program CKM 2022 di Waterfront Kuching malam ensana.

Iya mega madahka perambu nya mega bisi dikunsika enggau menua Thailand.

“Kelimpah ari nya, perintah mega ngatur Gelembung Dagang Temuai Entarabansa Langkawi (LITB) kena bulan November 2021 ti ngemendarka temuai menua luar datai ke Malaysia nengah Pulau Langkawi.

“Inisiatif tu nyadi pansik tumu ngagai sektor dagang temuai nyengkaum pemain industri enggau ejensi perintah ngagai gaya baru,” ku iya.

Ismail Sabri madahka taja baru tiga bulan diatur bisi 5,686 temuai menua luar nguna LITB ke alai projek nya udah meri penatai pemisi lebih RM28 juta ngagai ekonomi Pulau Langkawi.

“Kenyau projek nya dipejalaika nadai kluster rampit ti bepun ari temuai menua luar LITB dirikodka semina satu peratus aja ditemu positif Covid-19 ba baruh kategori 1 enggau 2 maya diperesa ba Padang Bilun Entarabansa Kuala Lumpur enggau Langkawi.

“Timbal ti manah ke diterima ari raban ti bejalaika LITB meri pechaya ngagai perintah neruska LITB nyentukka pintu garis entara menua dibuka penuh ila,” ku iya.

Iya mega nerangka, dalam Bajet 2022, perintah udah mantaika bantu khas penyampau RM85 juta ngagai lebih 20,000 orang ti ngaul dagang temuai ti berejister di baruh Opis Menteri Dagang Temuai, Seni enggau Main Asal Malaysia (Motac).

“Ungkup penerang, bantu tu deka dibayar dua kali iya nya bulan March enggau bulan Mei.

“Entara orang ti deka nerima pemaik bantu tu iya nya 10,000 iku malin temuai ti deka nerima RM1,500 siku, 5,592 buah ejensi dagang temuai (Tobtab) ti deka nerima RM9,000 enggau 3,100 iku pengemeran dagang ‘homestay’ ti deka dibayar RM1,800 siku.

“Aku ngarapka semua inisiatif enggau chara ti digaga perintah ulih ngeranchakka baru sektor ekonomi enggau nyungkakka baru nama Malaysia ba sektor dagang temuai nyadi palan ti dipilih dunya endur nemuai,” ku iya.

Malam nya mega, Ismail Sabri madahka program CKM sekali tu deka ngatur Konsert Sape ti deka dipasukka dalam ‘Malaysia Book of Records’ ketegal disereta pemain sape pemadu mayuh iya nya 250 iku.

Suara Sarawak