KUCHING: Komiti Penyangga Penusah Nengeri (JPBN) dipelabaka deka baum enggau raban penau pasal pengerai di menua tu bekaul Atur Pengawa Standard (SOP) baru Opis Menteri Pengerai Malaysia (KKM) tu madahka kaul semak pesakit Covid-19 deka diserenih sereta enda ibuh dikuarantin.

Sapit Kepala Menteri ti mega Menteri Pengerai Mensia Mayuh, Pengawa Berumah Enggau Kaunsil Kandang Menua Datuk Seri Dr. Sim Kui Hian madahka sida deka nanya penemu raban penau ketegal gaya pengerekai penyakit nya di Sarawak bebida ari Semenanjung Malaysia.

“Aku selalu madahka Sarawak enda sebaka enggau Semenanjung Malaysia, din nyema 30,000 rayat kena rampit Covid-19 sida bisi mayuh palan berubat tauka sepital.

“Ba Sarawak nyema penyampau ti sama (30,000 iku) dirampit, kitai nadai mayuh sepital endur berubat,” ku iya.

Kui Hian bejaku munyi nya rambau bejadika Palan ‘Kitar Semula’ ba pasar mit Desa Wira ditu, kemari.

Ku iya, Chairman JPBN Datuk Amar Douglas Uggah Embas dipelaba deka mai raban penau baum pasal pekara tu ngambika pemutus ti digaga engkeman enggau gaya kes nya di menua tu empu.

“Semua pemutus ti digaga kami, nya pemutus ti pemadu manah ungkup rayat Sarawak.

“Aku meri terima kasih ngagai rayat Sarawak laban ngempu semangat solidariti dalam kitai napi penanggul tu ngujungka penyampau rayat ti divaksin ba menua kitai tinggi.

“Ukai reti aku deka mekit menua bukai tang aku deka madahka rayat menua kitai ngembuan tanggung pengawa sida enggau manah nya alai penyampau orang ti dirampit Covid-19 ba menua kitai mimit,” ku iya.

Iya nyemetak madahka semua polisi ti diatur KKM asalka polisi nya manah ungkup rayat Sarawak sida ulih nerima.

“Aku pechaya JPBN enggau raban penau ulih nerima tang polisi nya mesti engkeman ngagai kitai,” ku iya.

Suara Sarawak