Tuai Rumah sebagi ari tim perintah – Friday Belik

SARATOK: Pengawa nyadi Tuai Rumah (TR) endang tau disema baka ‘kaki enggau jari’ pengereja pengawa perintah, laban sida dikeandal ngatur pendiau lalu nyadika jematan entara rayat enggau opis perintah,” ku Adun Krian Friday Belik.

Ku iya, perintah mega nadai kala mejal bala Ketuai raban bansa, baik nya Tuai Rumah (TR), Penghulu tauka Pemancha nyukung perintah.

“Tang laban sebarang sapa ti dipilih nyadi tuai rumah sigi patut lalu enda tau enda nemu ungkup tanggungpengawa ti dilempaika ba bau sida.

“Pia mega, patut ngembuan penyedar ngagai diri empu ti udah nyadi sebagi ari tim perintah ti bekuasa.

“Nya kebuah, enti nyadi tuai rumah, sida mesti sereta patut ngaul lalu nyukung semua pengawa tauka genap iti aktiviti digaga perintah,” ku iya.

Friday madah munyi nya lebuh bejaku rambau bejadika Program Apresiasyen Pengatur Pengawa Pelilih Saratok ba Opis Pelilih Saratok kemari.

“Nyadi, asai ba aku enda ibuh aku ngelansa enggau panjai agi pasal tanggung pengawa kita ti nyadi tuai rumah.

“Laban tebal tentu udah mereti enti bepelasarka ari peneleba tauka pengelama bala udah megai pengawa.

“Tambah mega, endang udah nyemetak dipadah tuai rumah iya nya siku orang ti nyadi jematan enggau titi entara opis perintah.

“Kelimpah ari nyaga pengelikun lalu ngatur sereta ngiring tauka ngembing nembiak redak diri,” ku iya.

Nambah nya, reti perintah munyi ku aku ditu iya nya ukai mai reti ngagai perintah politik taja endang amat perintah ti bekuasa ke diatu dichirika ari parti politik.

“Tang kitai enda tau malut semua utai enggau politik, lebih agi enti pengawa iya ke bekaul enggau pengidup besehari-hari.

“Nya alai, aku udah tu ngarapka bala tuai rumah ti udah dipadu, anang sanggu ngelawa opis-opis perintah.

“Chunto baka Opis Pelilih Menua, Opis Betanam Betupi, Opis Pengerai, Bomba enggau ke bukai.

“Berandau enggau pegawai ke bisi gawa dia, ngambika tau bulih penerang tauka penemu ti beguna ungkup diterang ngagai nembiak pegai diri empu.

“Tu mega siti ari jalai tauka chara ti ulih dikena bala tuai rumah ngemansangka rumah panjai diri empu,” ku iya baru seraya ningkah penemu ti madahka perintah ngelama tu bisi ngenggaika tuai rumah ti enda sepenemu.

Udah nya, ku iya, politik menua kitai endang ngemeranka politik demokrasi, nya kebuah siku-siku kitai enda tau mejal pangan diri dalam pengawa politik.

“Genap kitai sepeneka milih parti deka disukung lebuh maya pengawa bepilih dipejalaika.

“Tang sedang dia anang enda beratika enggau silik ni bagi iya ke patut disukung.

“Laban enti salah parti disukung, tau bendar meri pengerugi ngagai diri empu,” ku iya.

Sama bisi datai Sapit Residen Betong, Abang Mohamed Turkey, Pemangku Pemesai Pelilih Saratok, Laga Kueh Staf ari Palan Servis Adun Krian enggau ke bukai.

Suara Sarawak