MAYUH URAS..Palan Telaga Kumang ba Bukit Melapi diperati enda diintu enggau manah.

KANOWIT: Palan Telaga Kumang ba Bukit Melapi, Ngungun nyau balat repa sereta kamah ketegal uras dibuai sengapa pengudah sesebengkah pengawa dipejalaika ba endur nya.

Nitihka penerang ari Facebook Panggau Online sekumbang palan tu udah kala diayanka ba media rama mayuh orang datai kitu tang sida pengudah raun kia ngujungka palan nya kamah laban uras.

“Aku arapka bala ke bisi limpang nemuai ngagai palan tu patut meri kerejasama anang muai uras sengapa endur.

“Ti nitihka jerita tuai, Kumang tu mih indu ti chukup beresi lalu palan endur iya mandi endang nadai uras, nadai buk undang, rau pan nadai enggau nadai ambuh ba endur iya mandi.

“Nyadi chukup sinu enti palan tu ditempayaka ngapa. Patut bisi komiti ditumbuh ngintu tauka nyaga palan tu awakka iya meruan bisi dipeda bala anak uchu ichit kitai jemah ila,” ku tandu penerang nya.

Naka tu palan nya balat enda manding dipeda ketegal mayuh uras baka plastik, umbang kuih enggau ke bukai.

“Arapka palan tu diintu manah dikena bebasaka pesaka jerita tuai siku indu dara Iban ke chukup beberita dalam jerita tuai ke dikumbai Kumang,” ku terang pemenggi akaun Facebook nya ngagai pemberita Ruai, Suara Sarawak.

Ungkup penemu, Kumang tu endang ukai orang sengapa laban semina orang ke bidik lansik aja dipadahka ulih betemu enggau indu tu dalam mimpi.

Nya alai, semak Palan Telaga Kumang tu chukup mayuh dipeda teresang piring alai orang beniat minta tela, minta perening, minta iching Petara nitihka pengarap lama.

Suara Sarawak