Ubah kunstitusyen dikena nyekat ulah merejuk parti endang buah penemu badas
Datuk Idris Buang

KUCHING: Perambu ubah kunstitusyen dikena ngetuka ulah merejuk parti endang buah penemu ke badas dikena nyekat ulah ke ngerusak demokrasi.

Pia ku Sapit Speaker Kunsil Nengeri (DUN) Datuk Idris Buang ti minta pekara nya mesti dipejalai iya nya madamka status sesiku kaban parlimen tauka pengari rayat nya nyema sida merejuk ngagai parti bukai kelimpah ari parti ti udah ngasuh iya menang ba pengawa bepilih.

“Kunstitusyen endang undang-undang pemadu tinggi ti deka mutuska status sesiku kaban parlimen tauka pengari rayat ngelepaska pangku pengawa diri.

”Nya alai, tu endang saut ke nyemetak dikena mutarka penyarut ke udah ngerusak demokrasi,” ku iya sehari tu tadi.

Pia mega, Adun Muara Tuang nya madah betukar orang ke merintah udah dipeda bekau ari penyarut politik ti nadai prinsip lalu ngujungka penuduk kaban parlimen tauka pengari rayat nyauka baka komoditi ke udah dijual beli.

”Lebih agi, penegap politik enggau ekonomi menua deka nyadi pedis ketegal penyarut politik ke baka nya.

“Bisi mega entara sida ke enda badu-badu ngereja ulah nya ketegal ngulihka kuasa enggau nguji nyadi perintah taja pekara ke nyata sida nadai pengulih ngatur menua,ku iya.

Beduduk ari nya, ba ripot berita apin lama ke udah Menteri ba Opis Menteri Besai (Undang-undang enggau Parlimen) Datuk Seri Wan Junaidi Tuanku Jaafar madah ubah kunstitusyen, nyengkaum mantaika undang-undang benchi-merejuk, benung diatur lalu deka dibantai ba aum Parlimen kena 28 Februari.

Suara Sarawak