DIPUJI… Raban trafik Marudi ti mantu ngaduka entukar ti rusak ditepan dua iku diri sebilik dipuji mensia mayuh.

MIRI: Ulah siru seraban polis ari Unit Pansik enggau Penerit Trafik Marudi mantu miki entukar 4WD ti rusak tengah jalai dipuji mensia mayuh.

Tuai Unit Trafik Marudi Inspektor G visvanathan madah, raban iya benung bejalaika pengawa RJJ/SJR di Jalai Beluru/Long lama beserimbai enggau Op Selamat Tahun Baru China ke-17 pukul 12.05 tengah hari ensanus.

“Lebuh datai ba Jalai Beluru/Lapok, iya enggau tiga iku agi raban trafik udah tetemuka sebuah entukar bansa Ford Ranger melintang enggau ngempang jalai.

” Raban trafik nya nanya deriba entukar nama penanggul ditapi iya lalu nyaup ngambi pejalai trafik lanchar,” terang iya.

Ku iya, deriba benama Laeng Ngau enggau anak iya, Denis Laeng benung ba rantau jalai ari Long spiling Tinjar nuju Miri, lebuh datai ba Jalai Beluru, enda mukai-mukai ‘coupling’ ba belakang techabut enggau tayar meletup.

” Sida udah nguji miki entukar urung sejam. Raban trafik Marudi terus matau jalai sereta mantu miki entukar nya.

” Pengudah sejam, entukar udah diadu enggau sida pan neruska pejalai lalu kami mega bisi meri ai mineral ngagai sida laban nadai kedai besemak, “ku iya nerang.

Nangkan nya, Laeng Ngau meri besai terima kasih ngagai raban trafik Marudi ke pemanah sida udah mantu iya.

Kebuah pia laban urung sejam seduai menyanak ngetu dia lalu nadai orang sanggup ngetu mantu seduai lebuh nya.

Ba lansa sama, mensia mayuh muji penyikar raban trafik Marudi ti mantu dua beranak nya sereta nentuka pejalai trafik ke Miri lanchar.

Suara Sarawak