Vaksin chukup beguna ngagai bala anak

KUCHING: Apai indai dipinta nganjung anak sida ke beumur 5 nyentuk 12 taun betuchuk vaksin Covid-19 berengkah 5 Februari tu ila.

Sapit Kepala Menteri ti mega Menteri Pengerai Mensia Mayuh, Pengawa Berumah Enggau Kaunsil Kandang Menua Datuk Seri Dr. Sim Kui Hian madahka vaksin nya beguna laban raban nembiak tu mudah kena Sindrom Pedis Isi Nembiak Mit (MIS-C) nyema dirampit Covid-19.

“Sindrom tu ukai semina nyerang atau sida tang ulih ngelumpuhka seluruh sistem tubuh sida.

“Nya alai, nerima vaksin ungkup nembiak ba umur tu amat beguna,” ku iya.

Kui Hian munyi nya rambau aum media Program Meri Vaksin Nembiak (PICKids) Sarawak di Auditorium CRC Sepital Besai Sarawak (HUS) ditu, kemari.

Ku iya, sebagi ari MIS-C nya ulih ngasuh pengerai nembiak ti dirampit Covid-19 balat agi raya.

Kui Hian madahka timbal rayat Sarawak ngagai program meri vaksin nembiak mit tu manah laban meda bekau timbal raban nembiak beumur 12 ngagai 18 taun apin lama disambut manah.

“Aku ngarapka kitai ulih bejalaika program tu manah nengah kerejasama semua raban bekaul,” ku iya.

Dulu ari nya, Sapit Kepala Menteri ti mega Chairman Komiti Penyangga Penusah Nengeri (JPBN) Datuk Amar Douglas Uggah Embas madahka naka 2 Februari tu tadi, Sarawak udah nyapai bungkur dos kedua.

Iya madahka sepenyampau 1,875,696 iku tauka 91.8 peratus raban tuai besai beumur 18 taun ke atas udah tembu dua dos vaksin.

“Bagi nembiak beumur 12 nyentuk 17 taun sepenyampau 259,432 iku tauka 88.4 peratus udah tembu dua dos vaksin.

“Ungkup serata rayat Sarawak sepenyampau 2,135,128 iku tauka 75.8 peratus sida udah genap nerima dua dos vaksin,” ku iya.

Tandu Uggah, bungkur orang ti udah tauka tau nerima dos vaksin pengalak mega udah nyapai 88.3 peratus.

Suara Sarawak