KUCHING: Serikat WaveMix Production udah mujur dipenyadi kemari lalu udah sedia nyaup ngemansang enggau ngerichahka agi dunya pemerindang lebih agi lagu-lagu Iban di menua tu.

Ditumbuhka tiga iku bakih kunsi, Andres Aduyan, Jimmy Pelikat enggau Arnold Aduyan lalu udah berengkah bejalaika pengawa kena 15 Oktober 2020 enggau nama The WaveMix Sound System sebedau ke betukar ngagai WaveMix Production.

Siku ari menijar (Pengawa Ngelaku Enggau Bejual) serikat tu , Ricky Ribot ti mega siku ari penanyi Iban ti tebilang ngarika WaveMix Production meri jaku pengelalu ngagai semua bala ke bisi datai ngulu pengawa nya.

“Ngarapka serikat tu ulih nyaup ngerichahka enggau ngangkatka agi industri pemerindang bansa kitai (Iban) ngagai tikas ke pemadu tinggi (entarabansa),” ku Ricky Ribot.

Nangkanka nya, WMP tu ukai semina palan alai ngasilka lagu tang mega bisi nyendiaka suwa keresa musik nitih pengarami ti atur, Live band, Jazz busker, set karaoke, ngaga iklan, ngelakuka barang serta mega bisi ngaga sukut tanya saut.

Dulu ari nya, Chairman ARAS, Gibson Rentap udah diberi basa bejadika opis WaveMix Production ba Jalai Song Thian Chok.

Bisi lima iku penanyi ba baruh WMP tu iya nya, Stanly (Stan), Nana, Brenda, Judah Anom enggau Kris.

Sebedau tu WMP udah kala ngasilka dua iti album lagu iya nya ‘Kumang’ ari Jimmy Pelikat enggau ‘Seruran Nganti ‘ ari Eva Lyn.

Kelimpah arinya, WMP sedia deka gawa sama enggau produksi bukai ambika ulih terus ngemansangka pengawa ba dunya pemerindang ngipakka visyen sida ti deka nyadi siti ari palan ke ulih ngangkatka dunya pemerindang menua ti bekualiti lalu misi WMP deka ngadaka pemerindang ti ngembuan pengelandik sereta asil lagu sida dijaga.

Suara Sarawak