LUNDU: Sepenyampau 9,000 iku anak Ketam Nipah spesies Scylla dilepas ke Sungai Sampadi, kemari.

Pengawa tu beserimbai enggau program ngelepas anak ikan, undang enggau ketam ti diatur seretai ba selampur menua.

Pegawai Opis Lundu, Gustian Durani madah ketam nipah tu idup ba paya bakau ai masin entara 15 ngagai 25 ppt (part per thousand).

“Ba pengawa ngeleas anak ketam nipah tu keterubah diatur laban Sungai Sampadi tu ngembuan mayuh pun bakau.

“Tambah mega, bisi sebuah serikat ditu bejalaika pengawa nupi ketam nipah iya nya Serikat Ginger & Coconut Development Sdn Bhd,” ku iya.

Gustian mansutka jaku nya ba Program Begulai enggau Orang Berikan sereta Ngelepas Ketam Nipah di Jeti Kampung Sampadi, kemari.

Ku iya, orang berikan di sitak Sampadi mega minto ketam nipah dikena ngiga belanja tambah kelimpah nurun berikan.

“Orang berikan ditu suah bulih entara tiga ngagai tujuh kilogram (kg) enggau untung entara RM120 nyentuk RM320 sehari,” ku iya nerang.

Berebak enggau nya, Gustian ngarapka pengawa ngelepas anak ketam nipah deka nambahka ketam di Sungai Sampadi.

“Kami mega ngarapka pengawa tu ulih nyungkak ekonomi rama orang berikan,” ku Gustian nerang.

Nambahka nya, Sapit Direktor (Pengatur Pengawa) Opis Berikan Sarawak, Liza Long madah, pengawa ngelepas anak ketam nipah ba sitak nya entara inisiatif nyain bekal pemakai di Sarawak.

Ku Gustian, Sungai Sampadi tu manah endur ngelepas anak ketam nipah laban ngembuan paya bakau ke manah endur anak ketam nipah.

“Inisiatif tu mega dikena mantu orang berikan nangkap ikan dikena nambahka penatai pemisi sida.

“Naka diatu, bemacham bansa kereban dikena nangkap ikan lalu penatai pemisi orang berikan dipelaba urung RM5,000 ngagai RM6,000 sebulan,” ku iya nerang baru.

Ungkup rikod, program ngelepas anak ikan, undang tauka ketam tu udah dipenyadi Menteri Betanam Betupi enggau Industri Pemakai, Datuk Seri Dr Ronald Kiandee di Tasik Putrajaya.

Ronald nengah sebengkah penerang madah, 1.85 juta iku anak ikan berega RM900,000 dilepas ba tasik di nengeri ti dipilih dikena nambahka stok.

Suara Sarawak