Martin (tiga kiba) nyuaka bantu BTS ngagai Prinsipal SMK Tebakang Serian Patrick Philip Moss (empat kiba) rambau Program BTS di Palan Pengatur Perintah Sarawak (Bagi Menua Serian) ditu kemari.

SERIAN: Sepenyampau 1,000 iku nembiak ari 108 buah sekula di serata Bagi Menua Serian nerima bantu nengah Program Bag2School (BTS).

Menteri Muda Betanam Betupi Moden Enggau Pemansang Kandang Menua ll Martin Ben madahka bantu tu siti ari tanggung pengawa mantu bala nembiak ti deka ke sekula kelebih agi apai indai nembiak ti kena pangka pandemik Covid-19 ti nyau semak dua taun ngerekai.

“Taja pan kitai deka ngalih ngagai renggat endemik (1 April) tang di Sarawak dalam kandang dua tauka tiga hari tu kes nyau majak nambah ke alai 99 peratus kes positif ngaul kategori 1 enggau 2.

“Aku beterima kasih ngagai Gerempung Pengelantang Pendiau Wang Turu Zon Sarawak tauka Bagi Menua Serian (Pertubuhan Kebajikan Dana Zon Sarawak @ Bahagian Serian) laban ngembuan tanggung pengawa rama mantu sida ti begunaka bantu,” ku iya.

Martin bejaku munyi nya rambau Bejadika Program BTS di Palan Pengatur Perintah Sarawak (Bagi Menua Serian) ditu kemari.

Ku iya, Bagi Menua Serian ngembuan mayuh sekula primari enggau sekondari ke alai pemesai menua nya disemaka mesai Nengeri Sembilan.

“Pegai Opis Pelajar Pelilih Menua Serian (PPD Serian) besai iya nya urung semilan buah sekula sekondari, 90 buah sekula primari enggau semilan buah sekula bansa China.

“Ari nya sigi mayuh meh bala apai indai kelebih agi nembiak begunaka bantu lalu aku pechaya bala pengajar kelebih agi kepala pengajar ngempu tanggung pengawa ti besai mantu sida baka ngatur kerejasama enggau Opis Residen Serian enggau Opis Pengintu Pengelantang.

“Taja pan palan tu mayuh endur orang betanam sawit tang apai indai ti kena pangka Covid-19 mega napi pemar meli barang ungkup bala anak sekula,” ku iya.

Iya andalka pengawa manah tu diteruska bagi mantu bala anak ti deka besekula taja pan dunya bisi diruga pekara bukai kelimpah Covid-19.

“Ukai semina Covid-19, dunya kitai mega bisi beperang baka menua Ukraine enggau Rusia ti ngujungka menua kita napi rega barang niki.

“Ungkus minyak majak nambah, nya ti balat ngujungka orang ti bepenatai pemisi baruh balat tusah.

“Nya alai, perintah enda ngetu mantu kitai nengah Bantu Khas Sarawakku Sayang (BKSS) ari taun 2020 nyentuk diatu ngaul belanja lebih ari RM6 billion,” ku iya.

Iya nangkan nya madahka diri deka terus mantu sekula di Serian kelebih agi sitak iya empu ngatur pengawa ti meri pemaik sereta meri empas manah ngagai bala nembiak sekula.

Suara Sarawak