Entara pemenang anugerah malam nya.

SIBU: Sepenyampau 26 bengkah anugerah udah mujur disua ngagai raban artis W&E Entertaiment ba sebengkah pengerami ke diatur ditu, malam ensana.

Menijar W&E Entertaiment ke mega chairman pengatur program nya Wandie Alie madah, tu mih keterubah serikat sida meri anugerah sereta setipikit pengudah serikat nya mujur direjister.

“Chukup betuah laban ulih ngatur program ke baka tu dikena meri basa ngagai semua raban artis baik ke nya penanyi enggau pelakun youtube,” ku Wandie.

Nangkan ke nya, Anugerah Khas Umur Idup udah diberi ngagai siku penanyi veteran Iban, Josephine Jalin.

Anugerah nya dikena meri tanda basa ke pengawa iya ti udah lebih ari 30 taun ba dunya pemerindang kitai Iban lalu iya entara artis lama ti semampai ngangkatka industri muzik Iban.

Anugerah Khas-Josephine Jalin nerima anugerah disuaka Adun Tamin.

Udah nya, Anugerah Penanyi Lelaki Tebilang diempu Yus Andrew enggau kategori indu dipenggi Vanessa Elaine.

Ungkup Anugerah Penanyi Dikearap Lelaki dipenggi Filbert Roxy enggau kategori indu dipenggi Valennie Olivia.

Nangkan ke nya, Anugerah Pemanah Vokal Lelaki dipenggi Joe Ashey lalu kategori indu dipenggi Valennie Olivia.

Ungkup, Anuerah Pelakon Drama Tebilang dipenggi Thomas Kana enggau Ain BPSA menggai anugerah ke sebaka ba kategori indu.

Udah nya, Anugerah Khas ari W&E Entertaiment dipenggi Nedine Bincent lalu Anugerah Khas Juri dipenggi Desmond Leo Janting.

“Arapka nengah pemeri anugerah nya, sida ransing agi ngasilka karya kreatif sereta terus ngangkatka industri pemerindang Dayak nyentuk ke tikas tinggi.

“Pia mega aku ngarapka industri muzik kitai (Iban) majak pegai seriris enggau singkang dunya moden.

“Terima kasih ngagai pengari media rama ti udah ulih datai ba pengawa tu sereta mega udah ngayanka raban artis ari W&E Entertaiment ba dalam media sida,” ku tandu Wandie.

Udah nya, enda tinggal terima kasih ngagai 30 serikat nyengkaum orang siku-siku ke udah gerah jari meri bantu ari sukut belanja dikena ngemujurka program tu baka tauke bridal, salun, pengempu produk pemajik, rumah asap, cafe, serikat hartanah enggau ke bukai.

Malam anugerah nya dipenyadika Kaban Kunsil Nengeri (Adun) Tamin, Ir Christopher Gira Sambang.

Sama bisi datai Pegawai Pelilih Menua Selangau Inting Nyami, Penghulu Andrewson Ngalai, Tuai Rumah Johnny Aman, raban artis ke lama enggau ke baru nyengkaum bala bala peminat lagu Iban.

Wandie Alie benung meri jaku pengelalu.

Suara Sarawak