Premier Sarawak Datuk Patinggi Tan Sri Abang Johari Tun Openg ngujika Scooter karan seraya dikemataka ari kiba Datuk Mohd Naroden Majais, Datuk Gerald Rentap Jabu, Datuk Seri Nancy Shukri, enggau Datuk Seri Abdul Karim Rahman Hamzah (kanan) nyerumba pengawa bejadika Program Sarawak X-Tive 2022 di Gedong, kemari.-Gambar Ramidi Subari

GEDONG: Anak Sarawak mesti ngembuan runding ti gerai enggau regas dalam pengawa ngemansangka menua tu sereta nyapai status Sarawak maju bepenatai pemisi tinggi ba taun 2030.

Premier Sarawak Datuk Patinggi Tan Sri Abang Johari Tun Openg madahka, tagit nya ulih dijapai nengah pengawa meransang nembiak menua tu ngemeranka ulah regas belumba enggau bemain.

“Nya alai, aku muji inisiatif ti dipejalaika Opis Menteri Nembiak, Lumba enggau Pemansang Dagang ngatur mayuh aktiviti dikena narit ati mensia mayuh.

“Nya ulih mantu menua ngemansutka nembiak ti chakah ukai semina ba lumba tang mega pekara dagang nuju ekonomi digital baka guna Internet of Things (IoT) enggau e-dagang,” ku iya.

Abang Johari ti mega Adun Gedong madah munyi nya rambau pengawa Bejadika Program Sarawak X-Tive Renggat Nengeri 2022 di Gedong, kemari.

Ku iya, program nya mega meransang mensia mayuh ngembuan gaya pengidup bepengerai laban diatu mensia mayuh kiruh enggau pengawa ngujungka sida kekadang enda ingat nyaga pengerai diri.

“Nya alai, enda sengaja program tu mai kaul mensia mayuh nguna sebagi ari awak sida ngaga aktiviti bemain awakka ulih ngemanahka runding enggau mantu nambahka daya produktiviti.

“Berebak enggau nya, mensia mayuh mega mesti nyaga pemakai dikena ngurangka risiko obesiti ti nyadi penanggul pengerai kedua pemadu tinggi di Malaysia nangkan penyakit atau,” ku iya.

Iya nandu, ari pengawa ngemeranka gaya pengidup chakah belumba enggau atur awak ti manah, rayat nengeri deka seruran ngempu runding ti regas.

“Aku pechaya nengeri tu ngembuan awak ti terang enti raban nembiak chakah, enda muntang nyerah alah sereta berani napi pemar ba maya ti deka datai ari sukung runding ti rasional.

“Aram kitai seruran ngemeranka daya idup bepengerai dalam pengidup ninting hari dalam nyapai juluk Sarawak maju 2030,” ku iya baru.

Program ti keterubah nya diatur ungkup ngerak gaya belumba awakka pengelantang enggau penyerakup rayat nengeri tu ngemeranka gaya idup ti chakah.

Pengawa ngelancharka Sarawak X-Tive tu diatur seretai ba semua 12 bagi menua diuluka Adun, pengari rayat enggau raban tuai di sitak sida empu.

Sama bisi datai Menteri Dagang Temuai, Seni enggau Main Asal Datuk Seri Nancy Shukri enggau Menteri Dagang Temuai, Industri Kreatif enggau Seni Pemerindang ti mega Menteri Nembiak, Lumba enggau Pemansang Dagang Datuk Seri Abdul Karim Rahman Hamzah.

Suara Sarawak