IBNUQALDOON MOHAMAD SHUKOR

GEDONG: Rayat nengeri tu ulih mujur dalam semua bidang ti dikaul sida nyentuk ngagai renggat entarabansa baka lumba elektronik (e-lumba), ku Premier Sarawak Datuk Patinggi Tan Sri Abang Johari Tun Openg.

Ku iya, nya nyemetak ulih dipeda ari pemujur anak asal Kampung Lalang, Gedong iya nya Ibnuqaldoon Mohamad Shukor ti ngarika menua ba Lumba SEA Hanoi Vietnam bulan Mei tu ila.

“Ibnu nempa sejarah nyadi rayat Sarawak ti keterubah ulih ngagai renggat entarabansa dalam e-lumba.

“Tu siti penyulut ti ngemegahka laban ungkup nyereta nyentuk ke renggat Lumba SEA, nya begunaka iya bemain video ti profesional, fokus sereta runding ti regas,” ku iya.

Abang Johari ti mega Adun Gedong madah munyi nya rambau Bejadika Program Sarawak X-Tive Renggat Nengeri 2022 di Gedong, kemari.

Ku iya, raban nembiak di nengeri tu mesti terus chakah enggau ngemeranka gaya idup bepengerai dikena nyapai penyulut baka ngarika enggau ngemegahka nama menua.

Ditanya baikka bisi insentif diberi ngagai Ibnu, Abang Johari madahka perintah udah nyendiaka insentif ungkup rintai atlit nengeri enti sida teulihka penyulut dalam lumba ti diarika baka pemujur Bonnie Bunyau enggau Datuk Pandelela Rinong.

Nangkan nya, Menteri Nembiak, Lumba enggau Pemansang Dagang Datuk Seri Abdul Karim Rahman Hamzah madahka, pemujur Ibnu ngelaika nyau nadai bida takah enggau kaul mensia mayuh di menua pesisir enggau mengeri ba sukut e-lumba.

“Tu nunjukka lumba elektronik mega udah dampih enggau nembiak menua pesisir ti nyadi kemegah rayat Sarawak kelebih agi opis menteri.

“Ngarapka Ibnu ulih bulih pemujur dalam pekit nya lalu nempa nama Malaysia enggau Sarawak,” ku iya.

Bekaul bantu ari perintah nengeri ngagai Ibnu, Abdul Karim madahka sida bedau berandau pasal pekara nya tang perintah udah nyendiaka elaun tauka insentif nitihka tikas renggat pekit.

“Pekara ti pemadu beguna nembiak kitai mujur dalam lumba, ngembuan disiplin ti tinggi kelimpah pengelandik, runding ti regas enggau enda kelalu nitihka ati,” ku iya.

Ibnu, 20 lebuh ditanya media madahka iya ngembuan semangat nempa sejarah enggau penyulut ngulihka midul ba pekit nya ngagai menua.

“Taja pan diau ba menua pesisir, tang aku endang minat bidang e-lumba maya beumur 13 taun suba, nya alai penyulut tu balat ngemegahka aku nyadi anak asal Sarawak.

“Aku deka nyereta kategori Free Fire, diatu aku benung chakah belatih enggau bala tim bukai,” ku iya.

Suara Sarawak