Datuk Seri Tiong King Sing

KUCHING: Opis Menteri Pengerai Malaysia (KKM) dipinta meri peransang pelajar ngagai rayat bekaul guna sereta penguntung ngambi tuchuk vaksin pengalak Covid-19.

Kaban Parlimen Bintulu Datuk Seri Tiong King Sing madahka KKM enda patut ngemba rayat bekau ari sida enggai nerima tuchuk dos pengalak.

“KKM patut meri pelajar ngagai rayat nyema sida enggai ngulihka tuchuk dos pengalak sida enda ulih mindah enggau nama penguntung bulih tuchuk tu.

“Kitai enda patut ngemba rayat madahka nyema enggai tuchuk dos pengalak MySejahtera sida deka betukar chura ngagai putih aja,” ku iya.

King Sing bejaku munyi nya rambau Aum Parlimen di Putrajaya ensana.

Ku iya, rayat patut diberi peluang milih bansa vaksin ungkup dos pengalak ti dituchuk ngagai tubuh sida.

“Anang mejal sida ngambi dos ti dikeenggai sida, sida pan takut.

“Nyema ngambi dos pengalak sehari tu, enda memukai pagi ila sida mati baka ni kitai nyaut?

“Kitai suah madah udah tuchuk lalu bisi komplikasyen pengerai, semua orang ulih nguna dalih nya,” ku iya.

Iya nangkan nya mai KKM berundingka pengelantang rayat sebaka lebuh perintah meratika sida ti nginsap.

“Enti ninting hari kitai ngemba, lagi orang madah kitai ukai Malaysia Sebilik.

“Aku bisi siku bakih udah ngambi dos pengalak jari iya enda ulih engkebut, enda ulih megai barang agi.

“Lebuh ngusung sepital sida madah komplikasyen pengerai, diatu iya garing-garing atas katil aja,” ku iya.

Iya mega, meransang KKM patut nusui Atur Pengawa Standard (SOP) nagang pengerekai Covid-19 ti nyemetak ngagai rayat.

Suara Sarawak