LANDIK BA TUNJUK JARI… Atong Ata tu entara komuniti ba Rumah Emak, Sungai Sut, Kapit ke chukup landik ngereja pengawa asal baka betenun.

LEBIH 50 taun ngemeranka pengawa betenunka pua kumbu ngasuh Atong Ata, 64, ari Rumah Emak, Sungai Sut landik endar nenun bemacham ukir tenun lama kitai Iban.

Nya kebuah, Suara Sarawak chukup betuah laban ulih bekelala enggau ngerandau siku orang ke anda ba pengawa asal kitai Iban ari menua Kapit tu.

Nambahka nya, Atong Ata mega chukup lanchat enggau sikar lebuh ngereja pengawa betenunka pua kumbu dataika iya nemu bemacham ukir tenun lama.

“Aku sigi belajarka pengawa betenun tu kediri maya aku agi dara kelia laban bai ati rindu.

“Sebedau ngepunka pengawa betenunka pua kumbu, aku dulu agi ngereja pengawa miring laban nya endang penti pemali sebedau ngereja pengawa tu,” ku Atong ngepunka randau enggau Ruai Suara Sarawak.

NGAGA UBUNG

PEMADU BESAI… Atong mantaika pua kumbu pemadu besai kala ditenun iya.

Ku Atong, lebuh betenun, kitai mesti nitihka rurun ngambi pengawa nya tadi nadai salah baka lebuh ngepunka pengawa.

Keterubah, iya deka milih ubung burak lalu digulai enggau tepung kanji awakka ubung nya enda bebulu sereta enda mudah putus maya ditenun.

Udah nya tadi ku Atong, ubung ke udah direndam sereta dijembui tauka diembun deka diengkah ba pelayang ubung ngambi digulung segala.

“Udah ubung tembu digulung, nya baru kitai datai ba pengawa ngirit ubung.

“Tuju ngirit tu ngambi ngemuntangka pengawa betenun lalu kitai deka ngena tumpok tauka dikumbai tumpoh.

“Tembu tiga bengkah pengawa nya, baru aku mengarap. Maya mengarap, kami ke betenun tu deka nyelitka ubung ba kayu mit ngena jari.

“Udah nya, ubung tu ditanchang ba kayu mit ke ditusun entara kayu lambongan enggau beliak.

“Proses bukai dikumbai menegi ngambi ubung nya muntang ditanchang.

“Ubung ke udah digarap tadi deka ditegi sereta dibagi ngagai dua iti, siti ba atas lalu siti agi ba baruh.

“Jalur ubung tu tadi deka ditanchang nitihka chura ke deka ditenun. Jalur tu mega ditanchang ngena tali.

“Tuju nanchang jalur nya awakka utai ke ditanchang tu enda diserap chura maya nyepuh pua kumbu tu.

“Ubung ke udah ditanchang nya deka diulih ari tangga ubung, udah nya direndam lalu dipulas sebedau nyepuh ubung enggau chura nya.

“Pengudah ubung nya rangkai dijembi, ubung tu deka ditanchang baru laban udah bisi chura iya empu.

“Tembu semua rurun nya, baru kami deka betenun baka selama,” ku Atong nerang pasal pengawa ngaga chura ubung nya.

RETI UKIR

PENGARAP BARU… Atong mega bisi nenun ukir kayu regang enggau dian.

Ku Atong, iya nemu betenunka empat bansa ukir pua kumbu tauka pejuluk ke suah digaga laban endang lama udah ngereja pengawa asal tu.

Nyadi ku iya, lima bansa ukir pua kumbu tu iya nya Sandung Betung Melepik, Nabau Ngerarau Gali, Belia Indai Abang, Ambun Belabuh engggau Buah Bengkung.

“Ukir Sandung Betung Melepik, Nabau Ngerarau Gali tu reti iya ‘empa jamah’ ke alai enda tau digaga ngapa.

“Ukir tu mega enda tau digaga sida ke biak. Semina orang tuai ke bisi peneleba aja dikemendar ngaga ukir tenun tu.

“Ukir Belia Indai Abang nya mai reti ‘atau jani kitai’. Enti jani dibunuh ba tanju maya gawa, orang semina tau ngena pua kumbu ngena ukir baka ukir buah gelung tu aja.

“Ukir Ambun Belabuh tu mega entara ukir pua kumbu lama kelia lalu ukir Buah Bengkung entara ukir pua kumbu lama ke dikena nyambut antu pala,” ku iya nerang.

Nambahka nya ku Atong, naka diatu semina anak iya aja ke kala belajar betenun ari iya.

Iya madah, sabang mesti bisi dikena nyema bisi orang deka belajar betenunka pua kumbu tu.

Nampung baru randau, Atong madah entara perengka dikena ngaga pua kumbu baka pemalu taya, taya digaga nyadika ubung, akar engkudu, buah tajau tauka akar sebangki digaga nyadika chuk enggau belia.

Perengka bukai diguna baka pelayang, sengkabit, tali raffia, jengkuan, rakup, tendai, bebungan, penusuk karap.

Pia mega lidi, empaut punggung, penumpu kaki, ubung besai (karat) enggau tanggak ajan diguna lebuh betenun.

PENGAWA ASAL NYADI DAGANG

NYADIKA TEPA… Entara sidan ke suah dibeli nyadika tepa.

Bemacham bansa kain pua kumbu ke udah tembu ditenun dijual Atong Ata tu.

“Baka enggi orang bukai, aku mega bisi netapka rega pua kumbu nitihka pemesai enggau bansa ubung ke dikena.

“Baka kain kebat pemadu besai nya dijual aku berega RM500, baju kebat (RM500), selampai mit berega RM100 enggau ke besai berega RM200.

“Enti sirat nya dijual aku berega RM350, selendang pua kumbu berega RM200, pua kumbu besai berega RM1,000 lalu pua kumbu ke suah dikena miring nya dijual aku RM500.

“Naka diatu, pua kumbu ditenun aku tu udah dijual ba menua kami di Kapit ditu empu, Sibu, Miri enggau Kuching.

“Nya kebuah, besai pengandal aku arapka dagang pua kumbu kami di rumah panjai ulih rembus ngagai menua bukai ngena pengelebih media rama baka Facebook Pages ke udah ditumbuh tu.

“Laban mayuh orang udah ngelala aku, dia sida suah ngudar bemacham kain pua kumbu ari aku.

“Puji Tuhan, sida ke udah meli ba aku endang muji pemanah enggau pengalus kain pua kumbu ditenun aku tadi.

“Sida ke udah meli kain pua kumbu ba aku bela meransang aku nenun mayuh agi pua kumbu ungkup dijual dudi hari ila,” ku iya nerang.

UDAH TELEBA

KE PESAKA… Entara sida tau diengkah dalam cheremin nyadika pemandang ba bilik penaik

Ditanya pasal pemar ngereja pengawa betenun, Atong madahka entara pemar betenun iya nya begunaka mayuh awak maya nanchang tali lebuh ngaga chura pua kumbu nya.

“Aku suah lama lebuh nanchang tali nya tang ke bukai enda lama laban sigi landik ari kelia.

“Ambika chunto, enti betenunka lambar kain pua kumbu besai, seminggu aja aku ulih nembuka selambar nya.

“Tang enti pua kumbu baka ian kebat nya, kira empat hari aja pen ulih ditembu,” ku iya nerang silik.

Iya mega madah, perengka ti dikena betenun nya dibeli barang tang bisi ga sekeda iya ngaji orang dikena ngaga perengka ke diguna.

Atong mega madahka untung iya sebulan ari pengawa betenun tu kira RM1,000 ngagai RM3,000, bepanggai ba pemayuh orang ngudar kain pua kumbu ari iya.

Ku iya, penguntung sebulan ari pengawa betenun enggau bejualka kain pua kumbu tu nitihka pemayuh orang ngudar, makin mayuh orang ngudar, mayuh agi ga untung iya.

“Barang sapa ke deka meli produk pua kumbu ari aku enggau bala bukai di rumah panjai kami, kita tau ngelawa Facebook Pages Rumah Emak tauka telefon nuju lumur rasmi kami ba lumur, 0148415671.

KEREMBAIKA PENGAWA ASAL

“Aku mega ngarapka nembiak rebak baru belajar betenun enggau pengelandik asal ke bukai laban pengawa baka tu bisi penguntung besai.

“Kelimpah ari nya, pengawa tu tau bendar nambahka penatai pemisi ba ruang bilik kitai.

“Tambah mega, ngena pengelebih digital baka Facebook Pages tu, kitai ulih ngangkatka produk ari rumah panjai ngambi dikelala mensia mayuh ukai semina ba menua tu aja tang tau rembus ngagai menua luar.

“Tuju belajarka pengelandik asal tu mega sebagi ari chara kitai ngangkatka pengelandik asal ti ditampung ari aki ini kitai kelai.

“Nya alai, besai pengandal aku arapka pengawa dikereja aku tu nerima perati enggau dibantu ejensi perintah tauka raban ukai dikuasa perintah (NGO).

“Tambah mega, kami diatu udah bisi Facebook Pages ke nyadi nalan endur kami serumah ngelakuka produk dikemisi diri baka pua kumbu, tikai, sayur, produk ari leka manik enggau ke bukai.

“Kebuah pia laban ari saup ejensi perintah enggau NGO tu, kami ulih ngerembaika agi pengawa bejualka produk asal ari rumah panjai,” ku juluk ati Atong.

Ungkup penerang semua, kelimpah ari ngereja pengawa betenun, Atong Ata mega bisi ngaga techal engkabang enggau betanamka sayur.

Suara Sarawak