Baka ni kelai Tabin Jani Afrika?
foto pixabay

Raban penupi jani nengeri tu terus ditangkan ngambika seruran ngadang enggau penyadi penyakit Tabin Jani Afrika (ASF) ke diripot ngerekai ba tiga bengkah kandang nupi jelu jani ba Sibu.

Sebedau ditemu ngerampit sekeda kandang nupi jani di Sibu, penyakit ASF tu mega bisi ditemu ngerampit jani kampung ba menua Bidor enggau Sungkai di Perak enggau Jerantut, Pahang kena 17 Disember 2021.

Penyadi ASF di Sibu, udah dikenuku asil ari Peresa Nyenyit Timbal Mulai Besambung Polimerase (RT-PCR).

Nya alai, raban orang ke bisi nupi jani terus disebar patut ngelala baka ni kelai penyadi penyakit ASF tu iya nya jelu tupi sida mati ngenyit, tabin, sendat seput, kulit malui tauka balat mirah ba pending, enggai makai, tegenung, mutah, bira chirit, kembai buku tulang, kuris ba kulit enggau idung beinsak.

Pekara tu mesti dikemeratka raban orang ke bisi nupi jani lalu anang enda lengkas madah ngagai Opis Servis Veterrinar nyema bisi nemu jelu ke ditupi diri ngayanka kelai kena rampit penyakit tu.

Ba sebengkah penerang ke ayan ba Suara Sarawak kemari, dia Menteri Betanam Betupi Moden enggau Pemansang Wilayah Datuk Seri Stephen Rundi Utom bisi mesan pekara ke sama ungkup raban orang ke bisi nupi jani anang enda madah ngagai opis bekaul nyema jani ke ditupi sida bisi kena ASF.

Kenu ku iya, sida ke nupi jani ulih kena ukum nyema puntan ngaga ripot bekaul penyadi penyakit ASF ke nuntung jelu tupi. Nya alai, Rundi minta sida ke bisi nupi jelu tu patut ngaduka perengka guna baka ‘vuhicle dip’ tauka ‘foot dip’ nyengkaum pagar kelingi ti tegap ungkup sistem biosekuriti ba kandang nupi jani.

Penyampau ukum ke diletak nyema puntan ngaga ripot, ku Rundi iya nya ukum mata duit enda ngelui RM500 nitihka Seksyen 32-(2) Ordinan Pengerai Orang Periman Veterinar 1999 nyema sida dikenuku salah.

Kitai bela nemu, jani tu sebagi ari pemakai ke mayuh dipilih penguna di menua tu. Nya alai, penyadi penyakit tu tentu ngeruga penatai pemisi raban ke bisi nupi jani enggau bejualka dagin jelu nya.

Taja ASF bisi nyadi ba menua tu, mensia mayuh enda ibuh kelalu irau laban bekal jani ke bisi dijual ba pasar jam ke diatu chukup sereta dikenuku likun diempa.

Kelimpah di Sarawak, penyakit ASF tu mega bisi diripotka nyadi ba menua luar baka di Thailand enggau sekeda pelilih menua adap ke Sumatera Utara, Indonesia.

Bepelasarka penerang ari ‘Animal and Plant Health Inspection Service’ (USDA), Tabin Jani Afrika tu ukai penyakit ke ulih ngeruga pengerai mensia sereta enda ngerampit ari jani ngagai mensia (zoonosis).

Tang penyakit ASF tu iya nya sebansa igi penyakit ke mudah berampit enggau ulih nganu nyawa jani ke ditupi tauka jani kampung. Ungkup jani ke ditupi, ASF ulih berampit nengah chara betegu entara jelu enggau nengah pemakai ke kamah, ambika banding ari sosej tauka dagin mata.

Naka tu mega apin bisi sebarang vaksin dikena nagang pengerekai penyakit tu. Taja pia, perintah tauka raban bekaul ulih ngadang tumu nengah chara enda sengapa ngimport jani ari menua luar enggau mesti ngaga ripot nyema nemu bisi jani ke ditupi mandangka kelai ASF.

Penyakit ASF tu endang udah mayuh ditemu ba sekeda menua ba dunya lalu menua ke pemadu raya kala kena rampit penyakit tu iya nya Republik Dominican (1978) enggau Haiti (1979). Kelimpah ari nya, tujuh buah di Asia Tenggara ke kala buya ASF tu dalam taun 2019 iya nya Vietnam (19 Februari 2019), Kemboja (2 April 2019), Laos (20 June 2019), Filipina (25 Julai 2019), Myanmar (1 Ogos 2019), Timur Leste (26 September 2019) enggau Indonesia 12 Disember 2019).

Ungkup penemu mega, ASF keterubah ditemu ba taun 1921 ba menua Kenya, Afrika Timur. Udah nya, penyakit tu terus ngerekai ngagai mayuh menua nyengkaum rembus ke Asia.

Suara Sarawak