SIBU: Malam Hari Enam ti deka datai, Ryn’z Betta Café mai kitai beperindang enggau penanyi tebilang Tony Engkabi begulai enggau The Revolution Band.

Pengempu café nya, Korina Mang madahka pisin tauka gaya gari Malam Rock & Roll udah dipilih sida sebuat dikena ngerichahka pengerami malam nya.

ARAM SAMA CHAPUH… Poster Malam Rock&Roll ba Ryn’z Betta Café kena Hari Enam tu.

Ku iya, pemanah timbal diterima ba minggu siti nyin tadi ti mantaika muzik Sape enggau Ajat Iban udah meri peransang ngagai sida ransing agi ngatur pengawa pemerindang dia.

“Terima kasih besai ngagai bala ke bisi datai nyukung pengawa bala kami minggu nyin tadi. Sukung kita nya nyadika peransang kami.

“Minggu tu, sekali agi aku deka nesau kitai sama sampal datai beperindang enggau Tony Engkabi sereta The Revolution Band.

“Ingat mega, gaya gari kitai Rock & Roll. Aram sama chapuh malam Hari Enam, 2 April tu,” ku iya lebuh dirandau Suara Sarawak.

Sebarang tanya tauka deka ngambu mija dulu ba Ryn’z Betta Café tau telefon ngagai Julius ba lumur 011-1461 9311.

Berita penuh Ruai 5 pagila.

SUKUNG.. Korina begambar enggau raban Dayak Bukit Kelingkang (DBK) ti datai nyukung dagang iya.

Suara Sarawak