JULAU: Kaban Parlimen Julau, Larry Sng Wei Shien ngarapka Perintah Gempung Parti Sarawak (GPS) ulih ngamatka semaya ngaga baru Jematan Nanga Lasi munyi dipadah lebuh bekimpin ke Julau maya Pengawa Bepilih Besai Nengeri Ke-12 (PRN-12) tu tadi.

Ku iya, maya bekimpin ke Julau lebuh PRN-12 tu tadi, Premier Sarawak Datuk Patinggi Tan Sri Abang Johari Tun Openg bisi madahka perintah GPS deka ngaga dua iti projek ba Meluan.

“Dua iti projek nya iya nya Ngaga Baru Jematan Nanga Lasi enggau Projek Jalai Alun ti beungkus RM20,000,000.

“Nyadi, aku ngarapka Perintah GPS ulih ngamatka semaya baka iya ke udah disebut ba mua mayuh sebedau tu.

“Laban nyentuk sehari tu, apin bisi sebarang kelai projek dua iti tu deka berengkah dipejalaika,” ku iya.

Larry madah munyi nya lebuh dipinta nimbal penemu dipansutka siku pengguna Facebook benama Francis Dandi ba Facebook Julau Update ti madahka pemedis diri betengahka jematan gantung maya ngangkut buah sabun.

“YB Julau semina nemu ngasuh rayat menua Julau, betanam nanas, betanam rian enggau pengawa betanam kebukai.

“Tang bisi tauka enda sida iya berunding ke jalai ngemansutka asil utai tanam nya kini?.

“Perintah Sarawak bisi madah deka ngaga Jematan Nanga Lasi suba tang sampai sehari tu lalu nadai temu rita,” ku penerang ke ayan ba Facebook Julau Update nya, kemari.

Suara Sarawak