Produser Pekit Dara Kenyalang, Harry Frederick Diglin

KUCHING: Program realiti TV baru ngena Jaku Iban deka meri peneleba bebida ngagai bala ti rinduka pekit pemajik gamal kelebih agi ba Sarawak ditu.

Produser Silver Halides Pictures, Harry Frederick Diglin madah, program 13 episode nya nibak gaya atur pekit Kumang, Keligit enggau Dayung lalu dipegulai nyadi siti.

Ku iya, nya kebuah program realiti nya diberi nama Dara Kenyalang, ngempung penau etnik majoriti, Dayak enggau Orang Ulu di Tanah Kenyalang.

“Aku dekaka program tauka pekit tu meri empas ngagai komuniti enggau menua ukai semina di Sarawak enggau Malaysia aja, tang ngilah remang, dikelala menua luar.

“Juluk ati besai endar lalu program tu ukai semina ngambi nama tauka ngudahka pengawa aja. Aku andal, program tu deka dikeingat enggau ditemu semua,” ku iya lebuh dirandau Suara Sarawak, kemari.

NEMPA PENAU BARU… Poster pekit Dara Kenyalang

Harry madah, pejalai program agi bepegai teguh ba adat tang dikerembai ngagai dimensyen baru tauka tukuh baru nipakka tuju ngiga rebak nembiak baru ti bepenau enggau landik dalam industri seni kreatif di Sarawak.

Nya alai iya meransang bala indu dara kitai Dayak enggau Orang Ulu ari selampur Tanah Kenyalang sama berani mansang ke mua lalu mantaika penau enggau pengelandik diri.

“Tuju kitai deka ngiga orang ti megai gelar Dara Kenyalang tu patut bisi penau, pintar, landik enggau ngembuan runding ti regas ba semua sukut kelebih agi ngaul budaya enggau seni.

“Tu mih pelasar pemadu engkeman ngiga penau baru (new talent) ti ukai semina ulih nyaguka budaya, ngepan asal tang mega deka mai imej enggau identiti tauka pengelala bansa asal.

“Kital berasai gagit nempa nembiak ti bepenau ba pengawa bekelulu (acting), modeling, penabur berita, seni pemerindang enggau ke bukai.

“Ari nya tadi, kitai ulih nempa siku indu dara ti ukai semina bajik, tang mega landik ba pengawa bukai lalu ulih besemekih ba tikas ke tinggi agi udah tu,” ku iya.

Nambahka nya ku Harry, iya arapka program ngena jaku Iban tu deka marit Jaku Iban ngerembai enggau mansang sereta narit ati bansa bukai belajarka jaku asal tu.

“Kitai bechuntoka bansa Korea ti mujur ngerembaika jaku enggau budaya sida nengah industri seni kreatif baka filem enggau drama kelimpah ari seni pemerindang, raban k-pop.

“Kitai belajar ari sida (Korea), ti chukup puh ngangkatka budaya bansa nengah industri tu dataika nembiak mit pan ngelala enggau rinduka lagu sida taja ukai semua meretika utai disebut sida,” ku iya madah nyemetak.

Berindik ari nya, besai endar pengarap Harry ba pekit Dara Kenyalang deka mai seni budaya komuniti Dayak enggau Orang Ulu dikelala komuniti dunya dudi hari.

“Engka tusun keterubah enggau kedua empai mayuh orang ngelala tang aku pechaya, tusun nangkan nya deka muka runding enggau mata semua orang.

“Kitai udah meda program realiti TV baka Akademi Fantasia (AF) suba ke alai terubah dikeluar nerima mayuh jaku pejah enggau nadai mayuh sukung.

“Tang lebuh datai ba AF3, dia orang ti rindu majak mayuh, program nya nyau manggai rating lumur satu, bejuta iku orang meda ari selampur dunya.

“Utai baka tu dikedeka kitai. Empas ukai datai tekala nya, tang empat lima taun udah tu lalu meruan dikenang. Dara Kenyalang angkat nyadi pandung bansa Dayak enggau Orang Ulu,” ku Harry mantaika pengandal diri.

Ke penerang, Pekit Dara Kenyalang entara program pemadu baru ti deka dikeluar ba TVS enda lama agi.

Program bisi 13 episode nya dipungkal enggau pengawa audition tauka ngujika pengelandik, dientudika program penguji tauka dikumbai ‘cabaran’ sebedau renggat finale tauka kepenudi diatur.

Sepenyampau 24 iku indu dara deka diambi bepekit ti dipilih nengah audition ke alai enam pemekit kepenudi deka berebutka gelar Dara Kenyalang.

Perais mata duit RM10,000 nganti pemenggi gelar Dara Kenyalang disempulang enggau perais bukai.

Sebarang penerang enggau tanya silik pasal pekit sereta pekara bukai tau betanya ngagai raban pengatur ba lumur WhatsApp 011- 5130 6649 kelimpah ngelawa page Facebook Dara Kenyalang, Instagram dara_kenyalang enggau akaun TikTok dara_kenyalang.

Haribulan kepenudi peminta masuk pekit kena 13 March 2022.

Suara Sarawak