Dua kes pemati baru dirikod

KUCHING: Sarawak sehari tu ngerikod dua kes pemati ketegal Covid-19 ngaul dua iku lelaki beumur 65 taun.

Komiti Penyangga Penusah Nengeri (JPBN) ba siti penerang media madahka dua iku lelaki nya diripotka midang ba Sepital Sibu enggau Sepital Besai Sarawak.

Nitihka penerang nya mega, tudah ti midang nya asal ari Mukah enggau Samarahan lalu seduai midang kena 11 March enggau 14 March.

Tudah ti midang kena 11 March ditukuka nadai ditepan penyakit bukai seraya siku agi bisi sakit darah tinggi enggau sakit lempuang.

Kelimpah ari nya, Sarawak ngerikod 1,867 kes positif Covid-19 ngujungka penyampau kes positif di menua tu manggai 281,463 kes.

Pelilih Menua Kuching ngerikodka kes positif pemadu tinggi enggau 812 kes ditangkanka Sibu (167), Miri (160), Bintulu (158), Serian (103) enggau ke bukai.

Nambahka nya, Kluster Lorong Siol Kandis Kuching ditukuka punas kemari.

Suara Sarawak