UNGKUP PENGELIKUN… Jerip (dua kiba) nyuaka kereban pengerara api ngagai siku tuai genturung pendiau di Mambong.

PADAWAN: Bantu ti diterima rayat ba sitak Mambong disadang ulih ngerichahka agi sektor dagang temuai ba sitak nya.

Sapit Menteri Perengka Pengangkut, Datuk Dr Jerip Susil madah, pekara tu nyata dipeda pengudah pemansang infrastruktur ba sitak nya seriris enggau Strategi Pemansang Lepas Covid-19 (PCDS) 2030.

“Kitai udah nemu nama ke mesti dipejalai ba sitak tu. Pengudah pemansang infrastruktur, kami deka terus ngaga jalai kebun lalu dikemanah baka melakin jalai nya enggau ke bukai,” terang Jerip.

Jerip mansutka jaku nya lebuh bejadika Pengawa Nutup Taklimat Tuai Komuniti enggau Komiti Pemansang enggau Pengelikun Genturung Pendiau (JKKK) sereta nyuaka kereban pengerara api ngagai tuai komuniti ba Opis Pelilit Mit Padawan, Hari Tiga tu tadi.

Jerip mega ngarapka jalai kebun nya deka ngemuntangka peranak ba sitak nya lebuh mai asil betanam betupi sida.

Iya madah baru, bekal ai enggau kuasa karan mega deka disedia ngagai peranak Mambong dudi hari.

“Program lima taun deka disedia dikena mantu nyungkak pemansang ekonomi Mambong.

“Aku ngarapka program ti diperambu tu ulih mantu nyungkak ekonomi peranak di Mambong.

“Aku minta semua tuai genturung pendiau enggau tuai komuniti sama ngemujurka program tu,” ku Jerip.

Jerip mega ngarapka deka bisi bup tauka majalah digaga ngerintaika palan dagang temuai di Mambong.

Ku iya, bup tauka majalah tu deka matak mayuh pengusung raun ke Mambong.

“Kitai bisi empat genturung pendiau atas remang iya nya Kampung Kiding, Kampung Sapit, Kampung Kakas enggau Kampung Simuti.

“Lebuh kita datai din, kita deka ngasai baka ngindik remang laban tinggi,” terang iya.

Ku iya, semua genturung pendiau di Mambong mega mesti bisi rumah temuai kediri dikena matak temuai enggau pengusung ari mengeri sereta menua bukai.

Ngelansa silik, Jerip mega madah bisi 13 buah genturung pendiau ba sitak tu deka diangkat nyadi palan dagang temuai Coffee Belt.

Genturung pendiau tu deka disediaka kopi lalu disadang ulih ngeranchakka agi sektor betanam betupi nyengkaum dagang temuai ba sitak nya.

Sama datai Pegawai Pengereja Pengawa, Julius Scott Sapong enggau Temenggong Bidayuh ari Kuching, Austin Dimin.

Suara Sarawak