DATUK RUBIAH WANG

KUCHING: Kaban Parlimen Kota Samarahan, Datuk Rubiah Wang ngansak Perintah Besai ngaga jematan lambung sereta nampung dua projek nyeleti jalai dikena mutarka penusah jalai sekut ba sitak nya.

Ku iya, pekara tu patut diputar laban urung 23,000 entukar betengahka jalai nya ninting hari lalu penguna nyau besekut ba jalai alun tumu pukul 5 pagi.

“Entara projek ke mesti ditampung nya nyeleti jalai 8101 Jalai Dato Mohd Musa ke benung diseleti ngagai dua arung mesti ditambah nyadi empat arung beungkus RM229 juta.

“Opis Menteri Kereja Raya (KKR) mesti nentuka projek tu ulih ditembu nitihka taga taja bisi penanggul rega kereban berumbah niki kenyau ari pun taun tu,” ku iya nerang ba Facebook nibak jaku iya ba Aum Parlimen.

Nambahka nya, Rubiah ngansak perintah mesti nagga siti jematan lambung ba selingkut jalai semak Institut Tadbiran Awam Negara (INTAN) Kampus Samarahan.

“Pengawa tu beguna amat lalu mesti dipejalai dikena mutarka jalai ke balat sekut lebih agi maya jam pulai enggau mansang gawa ungkup penguna jalai alun ari Samarahan, Serian enggau Jalai Muara Tuang nuju Pasar Kuching,” ku iya nyemetak madah.

Rubiah mega ngansak perintah nampung projek Jalai Muntang Adap Selatan Padang Bilun Entarabansa Kuching.

“Projek tu disadang mungkur pengawa ngaga jalai ari simpang Bukit Berangan di Kota Samarahan nyentuk simpang Stutong di Kuching.

“Pia mega mungkur pengawa ngaga tiga jematan semin dua arung meraka Sungai Kuap, Sungai Stampin enggau Sungai Sangkoh,” terang iya.

Isu jalai alun sekut di Kota Samarahan udah majak nyadi kenyau ari berapa taun ke udah beduduk ari pemansang majak didiri ba sitak nya.

Entara chara bukai ti dipejalai diatu iya nya ngerah polis trafik gawa ba sekeda selingkut jalai maya jam pulai enggau mansang gawa dikena ngelancharka agi pejalai trafik.

Suara Sarawak