KUCHING: Pengawa nukar gelar Kepala Menteri ngagai Premier Sarawak nya beguna amat laban mai reti bida status enggau kuasa.

Sapit Premier, Datuk Seri Dr Sim Kui Hian madah, pengawa ngena gelar nya dikena ngepunka Sarawak nagih baru hak enggau kuasa otonomi.

“Jaku tuai bansa China bisi madahka gelar Kepala Menteri nya besai reti.

“Tu ukai semina pasal nama tang gelar nya mai status enggau kuasa. Kitai enggaika Kepala Menteri dikumbai seikas enggau tuai perintah nengeri bukai di Semenanjung,” terang Dr Sim.

Iya ngelansa pasal pengawa nukar gelar Kepala Menteri ngagai ‘Premier Sarawak’, Sapit Kepala Menteri mega ditukar ngagai Sapit Premier, seraya Menteri Muda digelar Sapit Menteri bepun 1 March tu tadi.

“Pengawa ngemetul ke gelar nya pengawa keterubah nunjukka kitai bebendar deka nagih mayuh agi hak enggau otonomi Sarawak.

“Premier Sarawak Datuk Patinggi Tan Sri Abang Johari Tun Openg deka ngetuaika tuai Gempung Parti Sarawak (GPS) ngambi bisi penuduk ke manah agi sereta nagih otonomi,” terang iya.

Nambahka nya ku iya, tu mega meri mandat ke nyata enggau teguh agi ngagai GPS nyadi perintah ngambi negapka penuduk Sarawak.

Nangkan nya, Dr Sim ke mega Menteri Pengerai Mensia Mayuh Pengawa Berumah enggau Kaunsil Kandang Menua madah, tiga undang-undang Sarawak mega diterit kena 1 March tu tadi.

“Undang-undang tu iya nya Ordinan Perlembagaan Negeri Sarawak (Pindaan), 2022, Ordinan Pihak Berkuasa Tempatan (Pindaan), 2020 enggau Ordinan Pengurusan Strata, 2019,” ku iya.

Suara Sarawak