NARIT ATI… Pemanah Gua Pari-Pari di Bau

KUCHING: Berita manah, Gua Pari-Pari (Fairy Cave) di Bau diatu dibuka baru ngagai mensia mayuh berengkah 11 March tu tadi.

Nitihka penerang ari Ejensi Kampung Sarawak (SFC), gua tu dibuka baru pengudah projek ngemanah dikena matak temuai ngagai guna nya tembu.

“Gua Pari-Pari diatu udah dibuka baru kemari lalu nganti penatai kita.

“Anang enda ingat mai kita sebilik sereta bala bakih bejalai ngagai guna tu,” ku penerang SFC ba Facebook rasmi, kemari.

SFC mega madahka bayar tama kiaa semina RM1 lalu gua tu dibuka ari pukul 9 pagi ngagai 4 lemai ninting Hari Dua ngagai Hari Lima sereta hari besai.

Taja pia, gua tu ditutup ninting Hari Satu.

Kena June 2020, Adun Serembu, Miro Simuh madahka gua nya deka berubah pengudah dua projek nyeleti dipejalai SFC tembu.

Ku iya, projek nya mungkur ngaga agu baru, kaunter tikit, nyeleti tangga, palan paking entukar, ‘viewer point’ enggau jalai bedarat ngagai tuchung bukit Pari-Pari.

Pia mega ku iya, pengawa nyeleti mega dipejalai ba sitak Taba Koperasi Fairy Cave lebuh nangkir sitak nya, nirika opis enggau bansal baru nyengkaum ngaga panggau baru ti dipelanja ngena agih belanja ari Program Transfomasyen Menua Pesisir (RTP).

Entara penyelai ba guna tu iya nya gaya batu ke suah endur sangkai kelab aktiviti lasak, niki tebing maya ujung minggu.

Nitihka cherita ditusui peranak ditu, gua tu bisi sejarah ke ditampung ari kelia.

Ku peranak ditu, suba peranak ba sitak nya suah menyadi anak mit enggau anak patu nyengkaum ‘semangat’ gua tu enda tan enggau penyai mensia ngujungka semua peranak disumpah bebali nyadi batu.

Taja pia, nadai bukti ti ulih nyukung cherita nya lalu mengkang nyadin cherita legenda Gua Pari-Pari.

Gua Pari-Pari tu udah digazet nyadi rizab di baruh SFC enggau pengusung menua ke deka tama ngagai gua nya dipinta mayar RM1 enggau RM5 ungkup temuai menua luar.

NARIT ATI… Pemanah Gua Pari-Pari di Bau

Suara Sarawak