KUCHING: Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah nerima manah (nyukung penemu) pintu adan menua Malaysia dibuka baru bepun 1 April tu.

Ku iya, nya inisiatif ke manah seriris enggau inisiatif dipejalai menua bukai dikena ngerichahka baru ekonomi ti tebunsa ketegal pandemik Covid-19 lebuh adan menua ditutup.

“Australia udah muka adan menua sida kena 12 Februari tu tadi, ditangkan Filipina sereta menua sepiak Indonesia enggau Singapore.

“Kitai mesti nerima Covid-19 tu meruan bisi tang nengah pengawa bejejaga lalu inisiatif dipejalai kitai nentuka kes tu jampat punas,” terang iya.

Karim ke mega Menteri Nembiak, Lumba enggau Pemansang Pedagang madah, Perintah Sarwaak entara nengeri ti udah bejalaika Strategi Pemansang Lepas COVID-19 (PCDS).

“Tu mega inisiatif meruan nentuka agenda pemansang menua ba pelasar ti betul.

“Nya kebuah, pengawa muka baru adan menua tu inisiaitif ke manah lalu kitai mesti bejalaika pekara tu laban penatai pemisi rayat majak kusut.

“Kitai mesti bejalaika pengawa begulai nentuka pengidup pulai baka selama,” ku iya.

Apin lama, Menteri Besai Datuk Seri Ismail Sabri Yaakob madahka Malaysia deka muka baru adan menua kena 1 April enti menua udah ngalih ngagai renggat endemik.

Nambahka nya ku iya, temuai entarabansa ti tama Malaysia mesti bisi dokumen pejalai ti sah sereta nerima vaksinasyen seraya Malaysia nadai penanggul nemuai ngagai menua bukai ke udah muka adan menua.

Suara Sarawak