NGABAS LPM…Majang (tiga kanan) begulai enggau bala bukai maya ngabas LPM kena Hari Empat tu tadi. -Gambar FB Pusat Khidmat Masyarakat Dun N.70 Samalaju

MIRI: Perintah Sarawak nengah Opis Menteri Infrastruktur enggau Pemansang Penyangkai Kapal (MIPD) deka beratika isu ke nuntung Kaunsil Penyangkai Kapal Miri (LPM).

Sapit Menteri Infrastruktur Enggau Pemansang Penyangkai Kapal Ii, Datuk Majang Renggi nengah sebengkah penerang maya pejalai ngabas LPM ensana madah, opis menteri iya deka nyidi enggau mutarka penanggul nya enggau lengkas.

Ba pejalai nya, Majang bisi mendingka taklimat ari Menijar Besai KLPM, Serawa Budol pasal pengawa ba Penyangkai Kapal Miri, tusun pengawa sereta isu ke nekul nyengkaum nanga sungai ke udah pabu ba Kuala Baram.

Kenu ku iya, dikena nentuka penyangkai kapal nya terus idup dudi hari sereta ulih matak pemeranak puku datai ke Sarawak, palan penyangkai kapal nya patut berundingka chara enggau ngatur strategi kediri dikena nangkup peminta industri enggau ngemuntangka pengawa dagang.

Kenu ku iya, tu nyengkaum nginsur timpuh penyangkai kapal nya lama agi awakka kargo ulih tama ke Sarawak.

Nya alai, iya meri jamin nyungkung LPM dalam nyapai visyen enggau misyen ke nyadi penyungkak ekonomi Wilayah Utara Sarawak lebih agi bagi menua Miri.-Ukas

Suara Sarawak