Isu seranta : Perundingka inisiatif engkeman nyungkak ekonomi rayat

KUCHING: Pemutus pansik pemadu baru madahka Sarawak nyadi nengeri pemadu seranta ba menua Malaysia nerima bemacham timbal ari sekeda rayat di nengeri tu.

Bekau ari nya, Menteri ba Opis Menteri Besai (Ekonomi), Mustapa Mohamed madah naka 15 Februari tu tadi, data ari bantu e-Kasih ngerikodka Sarawak ngembuan 62,930 buah ruang bilik bisi nerima bantu nya.

Asil ari pansik nya, ngenuku ke Sarawak nyadi menua ke pemadu seranta ba menua Malaysia.


WEANA SURING

“Tikas penyeranta ke tinggi ba Sarawak tu endang bepun ari perintah enggau rayat menua tu empu. Perintah patut belematika enggau silik penusah rayat ba menua tu, perundingka chara nyendiaka pengawa puang ngagai rayat menua tu dikena ngangkatka tikas ekonomi sida. Rayat ke nadai ngembuan pun penatai pemisi patut diperunding sereta giga inisitif ke engkeman enggau pengulih sida.”


JESSE ANAK NICHOLAS

“Ba penemu aku, tu bepun ari kurang pemansang ba Sarawak kelebih agi ba menua ulu agi jauh tinggal pemansang. Perengka guna pemun baka jalai tar, karan enggau bekal ai beresi pemadu beguna dikena ngangkatka tikas ekonomi rayat menua ulu. Nyema perengka guna pemun tu udah bisi rayat tentu nyamai ngemansangka tanah diri. Pia mega ba opis perintah chukup mimit bansa Dayak diambi gawa dibanding enggau bansa bukai. Tebal agi Dayak kereja kuli sebelah kedai sereta nerima upah ke pemadu mit.


JAQUILINE MURUDAN

“Penyeranta rayat Sarawak bepun ari gaji minimum kelalu mit sereta enda tetangkupka ungkus pengidup kemaya hari tu ke majak niki. Kitai sama nemu penyampau gaji minimum diatu RM1200 lalu nya enda tetangkupka ungkus pengidup ke besai baka dikena belanja ninting hari, mayar entukar, ungkus minyak kerita dikena gawa, bayar suwa rumah, bil karan enggau ai, kredit telefon enggau ke bukai. Nya alai, perintah patut bisi inisiatif bebatang dikena mutarka pekara tu.”


JILLY ANAK CHUNDA

“Menua ti kaya baka Sarawak ketegal pengeraja asal enti dikemansangka enggau betul tentu rayat enda dikumbai pemadu merinsa. Ambi chunto menua Singapore enggau Brunei sida kaya enggau penatai pemisi lalu rayat mega enda bangat merinsa. Sistem ngatur pemansang patut dikemanah agi, anang sesekali bechiping ngambika semua rayat bulih pemaik. Gaga lengkas jalai alun ke menyana, karan enggau ai beresi baka ba mengeri awakka pengidup rayat lebih agi ba menua pesisir tau bisi insur sereta muntang ngemansangka tanah sida betanamka sawit, getah, lada enggau utai bukai chara bedandang besai.”

Suara Sarawak