SAMA NYAGA JELU SIGA… Premier Sarawak Datuk Patinggi Tan Sri Abang Johari Tun Openg bejaku beserimbai enggau Hari Jelu Siga Dunya di Facebook Ejensi Kampung Sarawak (SFC), kemari.

KUCHING: Perintah Sarawak semampai ngemeratka pengawa ngintu enggau nyaga jelu siga di menua tu, ku Premier Sarawak Datuk Patinggi Tan Sri Abang Johari Tun Openg.

Ku iya, Perintah Sarawak nyendiaka bemacham endur nyaga jelu siga baka taman negara, kampung galau enggau santuari jelu siga dikumbai Palan Nyaga Penuh Jelu Siga (TPA).

“Santuari Jelu Siga Lanjak Entimau enggau Taman Negara Batang Ai nya entara chunto endur ti dikemansang ungkup nyaga jelu mayas di Sarawak.

“Pia mega, Taman Negara Laconia Shoals di Miri pemesai 1.2 juta hektar nya ungkup bemacham jelu tasik baka paus, jerung enggau terumbu karang,” terang iya.

Abang Johari mansutka jaku nya beserimbai enggau Hari Jelu Siga Dunya ba Facebook Ejensi Kampung Sarawak (SFC), kemari.

Nambahka nya ku iya, entara jelu siga ke mayuh ditemu ba Sarawak iya nya jelu mayas, burung kenyalang, engkuli raras sereta jelu tasik bukai.

“Pengawa ngintu jelu tu sebagi ari pekara ti dikemerat Kaunsil Pengatur Ekonomi Sarawak kelimpah ari Strategi Pemansang Lepas Covid-19 2030.

“Taja pia, inisiatif tu endang begunaka kerejasama sereta sukung semua orang.

“Nya kebuah, aku ngelalau mensia mayuh sama nyaga enggau ngintu jelu siga di Sarawak,” ku iya nerang.

Hari Jelu Siga Dunya diintu kena 3 March kelai pengawa nyaga enggau ngintu spesies jelu siga.

Berambaika jaku ‘Pemulihan Spesies Utama untuk Pemuliharaan Ekosistem’ pengawa taun tu fokus ba pengawa nyaga jelu ke majak punas.

Kampung hujan Borneo nya rumah ungkup 221 jelu darat enggau 420 spesies burung.

Suara Sarawak