KUCHING: Opis Pengintu Pengelantang Sarawak (JKMS) deka terus mantu tiga iku anak patut balu ke ditinggalka niang Damian Senin enggau Ronwina Mambai ke udah midang ketegal kena karan apin lama nyengkaum meri servis kaunseling.

Menteri Pemansang Orang Indu, Anak Mit Enggau Pengelantang Raban Bansa Datuk Seri Hajah Fatimah Abdullah madahka pekara nya amat beguna dikena matau runding enggau ati bala nembiak tu.

“Meda ngagai pendiau Elisa Olivia Damian ti beumur 10 taun, aku irauka iya ngenyit ngasaika diri mangku tanggungpengawa ti besai ngintu bala menyadi (Joseph Rayyan Damian, 8 enggau Magdalena Damian, 2) nyentukka iya enda ingatka diri empu pan agi nembiak.

“Kelimpah ari nya, kami irau nangika Elisa enggai ke sekula laban deka nyaga menyadi iya ti agi mit,” ku iya lebuh ditanya pemberita pengudah bejadika Program ‘Sarawak Women of Tomorrow 2022 (Swot-22) – Bootcamp’ di sebuah hotel ditu, tadi.

Iya nandu, ba sekula mega Elisa deka dibantu kaunselor awakka ulih matau iya lebuh besekula ila.

“Kitai meda dulu sida tiga menyadi tu ulih begulai (nelebaka diri) enggau ruang bilik baru laban pekara tu pan beguna.

“Kami ngarapka sistem sukung ruang bilik ari kaban belayan apai enggau indai sida terus tegap.

“Ba hari keterubah aku meda sida tiga datai ke Sarawak, kededua kaban belayan ari apai enggau indai sida sigi manah lalu deka ngintu bala anak tu, tu meh pekara tu dikeandalka kami,” ku iya.

Iya madahka, naka diatu bala anak tu agi diintu tauka dijaga aya sida tiga.

“Ngarapka semua pengawa sida bejalai enggau lanchar.

“Naka diatu, sida tiga nerima bantu ninting bulan penyampau RM500 sebulan kelimpah bantu bukai ti diberi dulu gi ari nya,” ku iya.

Suara Sarawak