MANTAIKA SEBANA RAYAT… Wilfred Yap, Lo Khere Chiang enggau tuai komuniti ngatur pejalai nemuai meri basa ngagai Direktor JPS Sarawak, kemari.

KUCHING: Opis Parit enggau Entali Ai (JPS) Sarawak dipinta nembuka pansik sereta ngelangkar sistem parit enggau lengkas dikena mutarka penusah bah tunggal ba Skim Pengentap Baru Stampin, Taman Happy Valley enggau endur besemak nya.

Adun Kota Sentosa, Wilfred Yap madah, pansik sistem parit nya entara chara timpuh panjai beduduk ari penusah bah tunggal majak nyadi berapa hari tu lebih agi maya ujan bangat.

“Ngarapka JPS ulih mutarka penusah nya pengudah bulih agih belanja pemansang ari perintah nengah pansik, perambu enggau nyendiaka ungkus ti patut.

“Semua sistem parit nya patut dikemanah ungkup pengawa nyendiaka pemansang berumah sereta mutarka penanggul ke ditapi rayat dia,” terang iya.

Wilfred mansutka jaku nya pengudah ngatur pejalai nemuai meri basa ngagai Direktor JPB, Ahmad Denny, kemari.

Sama datai Chairman Majlis Perbandaran Padawan (MPP) Lo Khere Chiang.

Bekaul chara timpuh pandak, Wilfred madahka sida deka terus matau sistem parit nentuka semua pengawa ngemanah dipejalai raban bekuasa dikena ngurangka isu bah tunggal.

Nambahka nya, Wilfred nyemetak madahka iya keran gawa nyadi mata enggau pending rayat sereta naka ulih mutarka isu mungkur komuniti ke diau ba Kota Sentosa.

Dulu ari nya, tuju penemuai nya laban deka berandauka penanggul ditapi rayat Skim Pengentap Baru Stampin enggau Taman Happy Valley ti napi isu bah tunggal maya ujan bangat lalu penanggul tu majak nyadi berapa hari ke duah.

Parit ke rusak ngujungka ai ujan lilih ngagai palan paking entukar sida lalu sekeda rumah ampuh nyentuk bilik besai lalu pekara tu udah ngenusahka rayat.

Nitihka penerang ari rayat di sitak nya, sida seruran ngaga ripot isu bah tunggal ngagai raban bekuasa tang penusah nya apin ulih diputar.

Suara Sarawak