Baru Bian

KUCHING: Kaban Parlimen Selangau, Baru Bian ngangkaika nama kebuah semina 198 peminta nembiak di baruh umur 18 taun ngembuan surat beranak ari Sarawak enggau Sabah ba timpuh lima taun ke udah.

Ku iya, Menteri Dalam Menua, Datuk Seri Hamzah Zainudin udah mantaika pekara nya dalam Parlimen kena Hari Tiga tu tadi ke alai 9, 259 peminta surat beranak diterima ungkup nembiak di baruh umur 18 taun ari Sarawak enggau Sabah bepun taun 2017 nyentuk 15 Februari tu tadi.

Nya kebuah ku iya, semina 198 peminta udah dikemendar iya nya 2.13 peratus ari penyampau peminta ke diterima.

“Reti iya, Opis Menteri Dalam Menua ngemendarka 40 peminta setaun ke mai reti, ari 100 peminta, semina dua aja dipelaba nerima berita manah.

“Nama kebuah peratus ngemendarka peminta nya baruh endar?” ku tanya Baru ba sebengkah penerang, kemari.

Ku iya nembiak Sarawak enggau Sabah ke nadai surat beranak udah dikelaung ari sukut pengerai, pekara pelajar enggau kereja dudi hari.

Beduduk ari nya, iya asa meda Menteri Dalam Menua ke enda nyaut tanya pasal peminta ex- ‘Border Scouts’ ke udah tuai deka nyadi peranak menua tu.

“Nadai kebuah nganti lama enggau ngemediska rayat lalu pekara tu nunjukka perintah enda ulih ngereja pengawa ke mudah tu,” ku iya.

Baru ke mega Adun Ba’Kelalan madah, nya kebuah mayuh rayat Sarawak dekaka otonomi dikena nentuka sida bulih status peranak nyadi kelimpah ari sukut pekara pelajar enggau nyaga pengerai.

Terang iya, rayat (pegawai) ba Opis Menteri Besai udah ngereja pengawa jauh ari pematut ungkup rayat Sarawak lebih agi sida ke diau ba menua pesisir.

Lebuh ngelansa pasal nembiak ke ‘ukai peranak menua’ enda ulih besekula, Baru madahka penerang Opis Menteri Pelajar nya atur eksekutif ke enda betul.

“Nadai kebuah atur nya enda ulih diubah ngambi ngemendarka nembiak besekula laban pekara tu nadai pulaika pemaik,” terang iya.

Ku Baru, ba kes tu perintah udah ngerampas hak rayat nyadi peranak sereta bekaul pekara pelajar enggau nyaga pengerai ti dijamin di baruh Konstitusyen Perintah Besai.

“Nembiak mit tu enggau orang tuai ke pemadu pedis lalu sida enda ulih mantaika sada ati tang ukai mai reti perintah mesti nunjukka ulah enda ibuhka sida.

“Nya kebuah, perintah ti siru enggau lurus ati deka bebendar mantu sida,” ku iya nyemetak madah.

Dulu ari nya, bisi 198 peminta nyadi peranak udah dikemendar ungkup nembiak di baruh 18 taun ari Sarawak enggau Sabah.

Ku Menteri Dalam Menua, Datuk Seri Hamzah Zainudin, statistik nya nitihka rikod Opis Pengerejister Bansa (JPN) ari taun 2017 nyentuk 15 Februari 2022.

Terang Hamzah, ba timpuh nya bisi 9,259 peminta nyadi peranak udah diterima ungkup nembiak di baruh umur 18 taun ari Sarawak enggau Sabah.

Suara Sarawak