Kenny (kanan) benung ngujika sebuah lagu ungkup siku penanyi.

Taja enda ulih nyapai juluk ati nyadi penanyi tang Kennyson Sullang Subat tauka Kenny Subat, 32, tepantup ati laban mujur nyadi komposer lagu Iban kenyau 13 taun ke udah.

Kenny asal ari Rumah Lembang Engkudu Atas Sebetan, Saratok madah juluk ati keterubah iya tama dalam dunya pemerindang laban deka nyadi penanyi.

“Amat enda disadang, tang nyangka udah atur Petara, aku temu tepejuh nyadi siku komposer lagu ungkup mayuh bala penanyi kitai Iban nyentuk ke sehari tu.

“Aku berengkah nyadi komposer lagu tu kira ba taun 2009 ari sebuah lagu dikumbai ‘Baka Duku Patah Ulu’ tang laban penemu agi pabu maya nya aku agi bedau nemu ni bagi muzik ti engkeman.

“Ari nya, aku betemu enggau Barky Sagai nembuka lagu nya datai ba taun 2010, nya ti ngujungka kami duai bekerejasama ngaga lagu nyentuk diatu,” ku iya madah ngagai Suara Sarawak, apin lama ke udah.

KOMPOSER LAGU…Kenny Subat

Ngelansa pasal pendiau diri, Kenny madah iya anak lumur empat ari lima iku diri menyadi, sigi rindu ke pengawa belagu kenyau ari mit.

“Meda diri enda mujur nyadi penanyi, dia aku terus fokus ngagai pengawa nyadi komposer.

“Taja nama aku bedau pegari, tang aku diatu udah mujur ngasilka urung 35 buah lagu bemacham rentak ngagai industri pemerindang kitai Iban,” ku iya.

Kenny madahka, pengawa nyadi komposer lagu tu rindu laban melodi enggau leka lagu datai ari runding ti kreatif ti enda ulih ditiru orang bukai.

“Nuan deka berasai tepantup lebuh mujur ngasilka tengkebang ti manah sereta rindu didinga peninga.

“Entara lagu aku ti chukup tebilang iya nya ‘Baka Duku Patah Ulu’ enggau lagu Nadai Penyangkai disadaka Danielasglg, lagu ‘Berubah Ati’ disadakan Elli Chellz, lagu ‘Ketegal RetaTeengkira’ disadakan Joseph Jawan enggau lagu ‘Pegi’ disadakan Markglo Awol,” ku iya.

Iya nandu madahka, ngaga lagu begunaka runding ti manah sereta chakah berunding.

“Buah runding nya nemu datai ngenyit, lebuh buah runding tu ayan sekelip mata aja aku ulih nembuka sebuah lagu.

“Tang ba aku empu, lebuh deka ngaga lagu kitai mesti ngembuan runding ti puang, maya nya kitai ulih bulih nusun leka enggau melodi ti manah,” ku iya.

Ku iya, sekumbang udah nempa nama nyadi komposer lagu iya berengkah dikelala mensia mayuh laban asil tengkebang nya ayan ba media rama enggau ba radio.

“Lebuh orang rindu ninga lagu digaga aku, ati aku chukup gaga lalu nya nyadi peransang dikena aku ngasilka mayuh agi lagu bukai ti lebih manah.

“Nya alai, dalam industri seni kitai Iban aku andalka kitai sama besukung pangan diri enda ngira ba bidang muzik tauka bidang bukai.

“Enti ulih kitai sama anang bechiping ati dalam ngemansangka industri tu tang sama beserakup ngambika industri tu terus ngerembai,” ku iya.

Iya nangkan nya meri terima kasih ngagai bala ti suah nyukung iya ngelama tu sereta arapka asil pengawa iya ulih diterima mensia mayuh.

“Ngagai bala peninga aku meri terima kasih laban enda leju ninga tengkebang ti digaga aku ngelama tu.

“Aku mega meri terima kasih ngagai semua orang ti mayuh nyukung pejalai dalam industri pemerindang baka Kumang Sangon Production M Sdn Bhd, Barky Sagai, bala penanyi, kaban belayan, ruang bilik aku empu enggau bala bakih.

“Enti ulih, ba maya ti deka datai aku andalka lagu ti digaga aku mujur tama dalam Anugerah Charta Sapa Juara (ACSJ) awakka aku terus bisi semangat ngasilka tengkebang ti manah,” ku iya.

Suara Sarawak