SIBU: Orang ti ngemeranka pengawa seni baka belagu enggau belakun dipinta ngangkatka jaku Iban nengah kreativiti diri, ku Ir Christopher Gira Sambang.

Kaban Kunsil Nengeri (Adun) Tamin nya madah, nengah industri seni pemerindang tu mih endang chara ke chukup jampat dikena kitai ngerembaika jaku Iban ngagai orang mayuh.

“Gaga cherita koporat, cherita adat asal kitai Iban, sereta mega bekenaka jaku dalam enggau jaku karung ba lagu.

“Tu endang siti jalai dikena ngerembaika jaku kitai ambika semua orang nemu lalu belajarka jaku kitai.

“Ambika chunto lagu ti disadaka Penghulu Andrewson Ngalai, Biar Bekikis Bulu Betis udah ditemu sereta dikerinduka selampur rayat ba Malaysia lalu lagu tu mega dikena orang bukai belajarka jaku Iban,” ku Gira.

Iya mansutka jaku maya bejadika Malam Anugerah Muzik W&E Entertaiment malam ensana.

Pia mega ku Gira, ba dunya pemerindang tu semua penengkebang enggau pengeluar filem mesti ngembuan juluk ati dalam ngangkatka industri tu ke atas agi.

Ku iya, nengah industri muzik Dayak tu mega ulih ngerembaika dagang ba menua Sarawak kelebih agi baka malin temuai.

“Aku enggau pengari rayat ke bukai endang seruran nyukung industri pemerindang kitai di Sarawak ditu ngambika terus dikerinduka semua orang,”ku iya.

Suara Sarawak