RINDANG…Bala nembiak enggau orang tuai besai bela gaga ati bemain nyepu gelembung.

SIMANGGANG: Aktiviti main gelembung ngerichahka Waterfront Batang Lupar sereta enda ngetu ditapatka peranak menua nya empu.

Nitihka penerang ari pedaja gelembung ba endur nya, Azizudin Hashim madahka pengawa bedajaka gelembung tu dipejalaika iya genap ujung minggu muak ke lemai aja.

Azizudin madahka diri bulih buah runding bedajaka gelembung tu pengudah iya meda anak tuai iya rindu amat bemain nyepu gelembung ba Sibu suba.

“Meda ba Simanggang apin bisi orang bedajaka gelembung, dia dih aku lalu nguna peluang nya bedajaka gelembung ba tebing ai Batang Lupar.

“Nambahka nya, pengurang palan memain ungkup anak mit sereta penyinu aku meda bala anak diri nadai utai ngerindang sida maya lemai hari.

Ku padah Azizudin, bandar Simanggang tu suba kala dikangau orang ‘bandar mati’ laban nadai mayuh palan ngelantangka ati. Nya alai, aku ngembuan juluk ati deka ngasuh bandar tu rami.

Bepun ari nya, Azizudin lalu berengkah bedajaka gelembung ba taun 2019 tang ngetu ba taun 2020 enggau 2021 ketegal pengelekai igi penyakit Covid-19.

“Naka ke diatu, timbal ari peranak menua tu empu endang chukup manah ukai semina dikerinduka bala nembiak mit tang mega sida ke tuai besai nyentukka kami duai bini aku nyau enda tentu chukup jari mela sida,” ku Azizudin.

“Sebedau aku bedaja gelembung ba tebing ai baru Batang Lupar baka ke diatu, aku suba bedajaka gelembung tu ba tebing ai lama Batang Lupar.

“Tebing ai lama nya suba chukup sunyi tang pengudah aku bedajaka gelembung tu, palan nya majak ditapatka bala nembiak mit enggau orang besai tuai,” ku iya.

Kenu ku iya mega, musim pengujan tauka ambis stok ai gelembung nya suah nanggul pengawa bedajaka gelembung.

Azizudin madahka diri berasai gaga laban udah ngasuh tebing ai Batang Lupar nya semampai richah, rami sereta ditapatka mensia mayuh maya ujung minggu lalu nembiak mit mega ulih bemain gelembung tu.

NERIMA SUKUNG…Azizudin Hussin begulai enggau bini sereta menyadi indu iya maya bedajaka gelembung ba Waterfront Batang Lupar.

RINDANG…Bala nembiak enggau orang tuai besai bela gaga ati bemain nyepu gelembung.

Suara Sarawak