Malaysia ngalih ngagai Endemik berengkah 1 April 2022

BEKENANGKA peneleba rayat ba serata dunya bepun dua taun ke udah nya kena 11 march 2020 pengudah Tuai Direktor Serakup Pengerai Dunya (WHO) Tedros Adhanom Ghebreyesus udah madahka dunya napi penyadi pandemik Covid-19.

Pandemik Covid-19 tu mai reti epidemik tauka igi penyakit ke ngerekai ba selampur dunya ngilah adan menua enggau menua ketegal Coronavirus tauka dikumbai Novel Coronavirus 2019 (COVID-19).

Pemutus nya udah ngubah gaya idup mensia ba serata dunya laban igi penyakit tu udah ngerekai enggau jampat dalam sejarah pengerekai igi penyakit bukai sebedau tu.

Malaysia mega nerima empas ari pekara dibantaika WHO lebuh kena 16 March 2020 Ba Penerang Khas Ex-Menteri Besai Tan Sri Datuk Muhyiddin Yasin madahka menua deka neritka Atur Mindah Betagang (PKP) bepun 18 March 2020.

NGELABAN PANDEMIK

LANCHAR… Muhyiddin ngelancharka Bup Program Vaksinasyen Covid-19 Nasional (PICK).- GAMBAR PENERANGAN.

Diatu, udah dua taun semua rayat Malaysia ngelaban igi penyakit Covid-19 nyentuk bisi lenyau pun penatai pemisi, putus pengawa enggau nutup dagang ketegal atur PKP ke udah nutup mayuh sektor ke enda disengkaum nyadi servis diguna.

Pekara tu meri pangka ke chukup besai ba pemansang menua laban semua perambu ke deka dipejalai perintah tejanggal ketegal PKP dikena munaska pengerekai Covid-19.

Sekumbang dua taun tu mega, bemacham inisiatif udah dipejalaika perintah nentuka semua rayat likun lalu pulai ngagai pengidup asal baka sebedau pandemik tu.

Pemujur Program Vaksinasyen Covid-19 Nasional (PICK) deka nyadi tikas pemujur besai menua ngelaban pengerekai Covid-19 laban nengah PICK tu kitai ulih nyapai imuniti beraban.

Naka artikel tu ditulis, tikas vaksinasyen rayat Malaysia ke udah nerima vaksin nya 78.9 peratus lalu nitihka penerang WHO, imuniti beraban ulih dijapai enti sema 60 ngagai 70 peratus rayat dunya udah nerima vaksin penuh.

Kena 8 March tu tadi nengah Aum Pemberita Khas Menteri Besai, Datuk Seri Ismail Sabri Yaakob udah madahka Malaysia deka ngalih ngagai Endemik bepun 1 April pengudah beratika bemacham pekara.

NGALIH NGAGAI ENDEMIK

LANCHAR… Muhyiddin ngelancharka Bup Program Vaksinasyen Covid-19 Nasional (PICK).- GAMBAR PENERANGAN.

Pengawa ngalih ngagai endemik nya strategi nentuka rayat pulai ngagai pengidup asal pengudah dua taun ngelaban Covid-19 tu.

Lebuh besebutka pengawa ngalih ngagai endemik, perintah enggau rayat mesti sedarka renggat tu pemadu pedis sebedau ngalih naggai renggat bukai lalu semina WHO aja ulih ngenukuka renggat tu.

Pemujur kitai ngagai renggat endemik dudi hari bepanggai dalam renggat ngalih ngagai endemik laban kitai deka pulai ngagai renggat pandemik baru enti sema kitai puntan.

Nya kebuah, bepun 1 April tu bemacham Atur Pengawa Standard (SOP) ke diatu deka dipadam lalu semina 10 SOP deka diterit sepemanjai timpuh ngalih ngagai endemik tu.

Pengawa neritka SOP maya ngalih ngagai endemik tu mega meri peluang ngagai rayat Malaysia nelebaka diri.

Taja kitai deka ngalih ngagai endemik, ukai mai reti kitai ulih ngereja semua pengawa sepeneka ati laban atur baka ngena sengkabung mua enggau scan aplikasyen MySejahtera agi dikena.

Pia mega, adan menua mega deka dibuka bepun 1 April tu ba renggat ngalih ngagai endemik tu. Pemutus perintah muka baru adan menua tu bepelasarka tiga pekara.

Kesatu, bemalinka sains enggau penerang pemadu baru bekaul Covid-19, kedua nya beratika peminta muka adan menua di menua bukai lalu ketiga nya meri pengelantang ngagai temuai enggau nentuka Malaysia nyadi palan ke mudah dilawa mensia ari serata dunya.

Nya alai, semua rayat Malaysia dipinta ngasika atur perintah nentuka kitai mujur ngalih ngagai endemik.

Kelimpah ari nya, rayat di menua tu dipinta ngemeran gaya idup pengerai baka suah agi masu jari enggau ngena penuchi hari nyadi chara idup baru dikena ngelaban igi penyakit.

NERITKA ATUR… Atur Mindah Betagang Diterit (PKPD) di Jalan Masjid India.

 

NYAGA PENGELIKUN… Gaya Program PICK.

Suara Sarawak