Manang Tuah ngarapka elaun bala lemambang diperunding
Manang Baya tauka Tuah Adong

Pengawa belian tauka bemanang tu endang bepun ari ajar Raja Menjaya iya nya siku ari menyadi sida Sengalang Burung.

Iya dibangun nyadi manang ngambika bisi ngubat bini Sengalang Burung ke suah amat tabin.

Pengawa tu mega nyau jarang dikereja kelebih agi ba kadang mengeri laban orang ke nyadi manang pan nyau udah kurang tauka mimit agi ngemeranka pengawa tu.

Sayauka pengawa tu lenyau nitih ubah dunya, ngena peluang ke serak tu, Suara Sarawak udah berandau enggau siku manang lalu betanyaka senentang pekara nama utai disebut pengawa belian nyangka tu ila tau nyadika malin tauka adat lama kitai bansa ke patut ditemu rebak abru.

Tuah anak Adong siku ari manang ti dikelala mensia mayuh lalu suah diinjau belian ba selampur menua Sarawak.

Manang Tuah benung belianka orang ti sakit.

PUCHAU PANSA UTAI

Peranak asal Pakan tu diau mendam ba Rumah Barak Nyalak Ili Pakan madahka diri dikelala ari iya ke nemu muchauka orang kena pansa utai.

Lebuh ditanya bakani cherita pun nyadi manang, iya nusuika diri endang keterubah diasuh muchauka orang ti sakit enggau kena pansa utai.

“Udahnya aku dibangun nyadi manang ngena adat manang,” ku iya nerangka keterubah iya dibangun nyadi manang.

Entara manang ke bisi mangun iya lebuh suba iya nya Manang Jarum, Manang Lanyun, Manang Busang enggau Manang Junit.

Iya mega nusui enggau ngelansa senentang adat dikena bebangun baka mupu beras ngagai rumah panjai ke sama sepemakai tauka dikumbai ‘pupu manang’.

Pia mega lebuh ke ai, sida iya bisi ngaga pantar manang ngena piring turun tiga laban enggaika bisi ninga burung lebuh ngereja pengawa tu.

“Pengawa ngelulun asi pulut semina seruas aja laban deka diempa ba pengawa ngaga pantar lebuh maya ngulurka pelangka.

“Lebuh maya ngambi pelangka, piring turun lima sereta pelangka enda tau diturunka ngapa laban mega deka ditimang lemambang.

“Lebuh pengawa nikika pelangka tu, pengawa nimang enggau begendang deka dikereja laban tu mih chara adat manang,” ku iya nerang.

BESERARA BUNGAI

Lebuh ditanya senentang nama bansa pelian ti kala dikereja kitai Iban, ku Manang Tuah tauka Manang Baya, entara pelian nya beserara bungai  (ngena bungai), belian sakit, belian belaya tauka bebunuh buyu, nyereki kandung, betambak bulu enggau mayuh macham agi pelian.

“Belian nyereki kandung jarang amat dikereja kitai ke diatu laban pelian tu endang dikena ngagauka Sempandai.

“Enti dulu kelia, Sempandai bisi didinga bemunyi ba ujung bilik nya deka nunjukka orang nya deka bulih anak indu lalu enti bemunyi tunggaka ruai deka bulih anak lelaki,” ku iya nerangka ngagai Suara Sarawak.

Manang Tuah mega madahka pelian ti chukup besai iya nya pelian beserara bungai laban nya mih pengabis iya kitai bebagika utai entara kitai ke agi idup enggau sida ke udah midang laya sulai, udah danjan midang ke Batang Mandai.

Lalu ke lumur dua pelian ke pemadu besai iya nya bebunuh buyu lalu ketiga iya belian begiling lantai tauka betukar entara orang ke sakit enggau manang.

“Belian begiling tikai tu pan nadai tauka jarang dikereja kemaya hari tu laban tu entara pelian ke besai mega,” ku iya.

Senentang ‘yang’ ti dikena manang ku iya, nya enda sebaka nitihka maya dibangun lalu ‘yang’ ke pemadu besai iya nya Antu Gerasi.

Manang Tuah benung belianka orang ti sakit.

UPAH MANANG BELIAN

Lebuh ditanya senentang nama upah dikena manang lebuh maya belian, Manang Tuah nerangka entara upah iya nya kebuk sigi, kain bedepa selambar, duku sebilah, pinggai sesingkap enggau manuk siku lalu tu mih ke pengering semengat.

“Ke diatu udah aku udah diambi orang belian datai ba selampur menua Sarawak sereta aku beterima kasih ngagai bala ke begunaka aku belian sereta aku besampi ke sida ke udah dipelianka aku gerai nyamai,” ku iya nusui penyauh iya udah belian.

Iya mega arapka nembiak rebak baru bisi ngembuan pengerindu lalu ngetanka adat lama kitai lalu pechayaka pengawa tu ila deka betampung baka wi tampung tali, baka rutan tampung danan.

“Aku arapka sida perintah kelebih agi Kaunsil Adat Istiadat Iban Sarawak (MAIS) berundingka kami manang enggau lemambang tu patut diberi elaun ninting bulan laban kami entara orang ke agi ransing ngetanka adat, main asal enggau pekara rama kitai bansa,” ku iya ngujungka randau.

Suara Sarawak