KUCHING: Soldadu Tasik DiRaja Malaysia (TLDM) merambu nirika Markas Wilayah Tasik (MWL) 4 di Samalaju, Bintulu dikena negapka agi operasyen enggau matau kandang tasik Sarawak.

Panglima Armada Timur, Laksamana Madya Datuk Sabri Zali madah, sida nengah Opis Menteri Penyaga Menua (Mindef) ba renggat kepenudi ngulihka taba (Samalaju) ari Perintah Sarawak.

“Perintah Sarawak udah nyendiaka siti palan di Bintulu iya nya Samalaju lalu kami deka ngepunka projek nya nengah Langgur Pemansang Malaysia Lumpar Ke-12 (RMK12) enti sema kami ngempu tanah nya.

“Tu bepanggai ngagai proses enggau belanja perintah tang perintah keran bejalaika projek MWL4 di Sarawak,” ku iya.

Sabri mansutka jaku nya ba aum pemberita pengudah bejadika Pengawa Nutup Latih Belayar Operational Sea Training Exercise East (OSTEX EAST) 1/2022, ensanus.

Ngelansa silik, iya madah naka diatu semina bisi tiga MWL di selampur menua iya nya MWL1 di Kuantan, MWL2 di Sandakan enggau MWL3 di Langkawi.

Iya madah, TLDM nyau ngena kereban ari MWL2 dikena bejalaika operasyen matau kandang tasik Sarawak.

“Kami bejalaika Operasi Satria 24 jam pengelama 365 hari ngambi nyaga Beting Patinggi Ali enggau kandang tasik Sarawak,” ku Sabri nerang.

NYIKAP DIRI… Panglima Armada Timur, Laksamana Madya Datuk Sabri Zali bejaku ba aum pemberita pengudah bejadika Pengawa Nutup Latih Belayar Operational Sea Training Exercise East (OSTEX EAST) 1/2022, ensanus.

Suara Sarawak